“Daryo” kundaligida 2-fevralda sodir bo‘lgan eng muhim voqealar
“Daryo” nashri 2-fevralda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya chegaralarini qayerda tugashi kerakligi haqida Gruziya talab bilan chiqdi
Ukrainadagi urushdan keyin tuziladigan bo‘lajak tinchlik shartnomasida Rossiya qo‘shinlarini Abxaziya va Janubiy Osetiyadan olib chiqish bandi ham bo‘lishi kerak. Gruziya prezidenti Salome Zurabishvili Bloomberg agentligi bilan suhbatda bu fikrni ilgari surdi.
“Rossiya o‘z chegaralari qayerda tugashini bilishi kerak. Bunda Gruziya masalalari ham hisobga olinishi zarur, shuningdek, hech kim Rossiya bosib olingan barcha hududlardan chekinmasdan turib bu urush tugashi mumkinligi haqida o‘ylamasligi kerak”, — deydi Zurabishvili.
Uning so‘zlariga ko‘ra, aks holda G‘arb “2008 va 2014-yillardagi kabi yana bir katta xatoga yo‘l qo‘yadi”.
Abxaziya va Janubiy Osetiya 1990-yillar boshida SSSR parchalanishi fonida oʻz mustaqilligini eʼlon qilgandi; o‘shandan beri Gruziya bu hududlarni nazorat qilmagan.
Ammo Gruziya Abxaziya va Janubiy Osetiyani rasman Rossiya bosib olgan hududlar deb biladi. Rossiya hukumati hududlarni o‘z tarkibiga kiritish niyatini ochiq e’lon qilmagan bo‘lsa-da, de-fakto, ular to‘liq Moskva nazorati ostida.
Isfahonga qilingan dronlar hujumining dastlabki tergov natijalari
Eron Mudofaa vazirligining Isfahondagi obyektiga uyushtirilgan hujum bo‘yicha dastlabki tergov natijalari hujum uchun Isroil javobgar ekanini ko‘rsatdi. Bu haqda Eronning Birlashgan Millatlar Tashkilotidagi doimiy vakili Amid Said Iravoniy ma’lum qildi.
“Dastlabki tergov natijalari sionistik rejim Isfahon shahridagi Mudofaa vazirligi obyektiga qilingan terakt uchun javobgar ekanini koʻrsatmoqda, bu rejimning harakatlari xalqaro huquqqa ziddir va qoralanadi”, — deydi Iravoniy BMT Bosh kotibi va tashkilot Xavfsizlik Kengashi raisiga yo‘llagan maktubida.
“Eron oʻz milliy xavfsizligini taʼminlash va sionistik rejim tomonidan har qanday tahdid yoki qonunbuzarliklarga, agar zarur deb bilsa, qattiq javob berish uchun qonuniy va daxlsiz huquqqa ega”, — deb taʼkidladi Iravoniy. Eron vakili BMT Xavfsizlik kengashini Isroil rasmiylarining jangovar bayonotlarini qoralashga chaqirgan.
OAV xabarlariga ko‘ra, hujum ortida Isroil va AQSH turgan bo‘lishi mumkin. AQSH bu portlashlarga aloqasi yo‘qligini ma’lum qildi. Isroil esa vaziyatga munosabat bildirgani yo‘q.
Isroil va Falastin o'rtasidagi aviazarbalar davom etmoqda
Isroil armiyasi 2-fevral kuni tongda Falastinning G‘azo sektori markaziga aviahujum uyushtirdi, deb xabar bermoqda AFP va Reuters muxbirlar hamda guvohlariga tayanib.
Mahalliy xavfsizlik manbalari va guvohlarning so‘zlariga ko‘ra, birinchi zarbalar – kamida yettita raketa HAMASning qurolli qanoti – Ezidin al-Qasam brigadalari o‘quv markaziga berilgan. Obyekt G‘azo sektori markazidagi Al-Mag‘ozi qochqinlar lagerida joylashgan.
Mahalliy xavfsizlik manbalariga ko‘ra, Isroil armiyasi tomonidan havo hujumlarining ikkinchi bosqichida G‘azo shahrining janubi-g‘arbidagi al-Qasam brigadalari o‘quv markazi nishonga olingan.
Qurbonlar yoki yetkazilgan zarar ko‘lami haqida hozircha ma’lumot berilmagan. The Times of Israel nashrining yozishicha, 1-fevral kuni G‘azo sektoridan Isroil janubi tomon raketa uchirilgan, ammo Raketa “Temir gumbaz” havo mudofaa tizimi tomonidan tutib olingan.
Shundan so‘ng Isroil ichki xavfsizlik vaziri Itamar Ben-Gvir hukumatni zudlik bilan javob zarbalari haqida muhokama o‘tkazishga chaqirgan.
Ayrim sabablarga ko‘ra yopib qo‘yilgan yerosti inshooti qayta tiklanishi mumkin. O‘zbekistonda vodiyni gaz bilan ta‘minlash imkoniyati to‘liq tiklanadimi?
Shimoliy So‘x yerosti gaz saqlash inshooti yana qayta ishga tushirilishi mumkin. Bu haqda Shavkat Mirziyoyev Andijon shahrida o‘tkazilgan yig‘ilishda ma’lum qildi, deb xabar bermoqda O‘zA.
“Afsuski o‘z vaqtida So‘xdagi yerosti gaz saqlash inshooti ayrim sabablar bilan yopib qo‘yilgan edi. Qirg‘izistondagi davlat tashrifi chog‘ida Sadir Japarov bilan bu masalada ham kelishib oldik. Yaqinda energetika vazirimiz Qirg‘izistonga borib, texnik tomonlarini kelishib keladi”, — dedi prezident.
“Shimoliy So‘x yerosti gaz saqlash inshootining hajmi taxminan 2,5-3 milliard kub metr atrofida. Shundan 1,3 milliard kub metr gazdan foydalanish mumkin, qolgani bufer zonada turadi. Bu degani qish mavsumida vodiyni har kuni 13 million kub metr gaz bilan ta’minlash imkoniyatimiz bo‘ladi”, — degan energetika vaziri Jo‘rabek Mirzamahmudov mazkur masala yuzasidan O‘zAga bergan intervyusida.
Uning ta’kidlashicha, mazkur inshootning asosiy gaz saqlash qismi Qirg‘iziston hududida joylashgan, kompressorlar esa O‘zbekiston hududida. Shu sababli inshootdan umumiy foydalanish borasida muzokaralar olib boriladi.
