“Дарё” нашри 2 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия чегараларини қаерда тугаши кераклиги ҳақида Грузия талаб билан чиқди
Украинадаги урушдан кейин тузиладиган бўлажак тинчлик шартномасида Россия қўшинларини Абхазия ва Жанубий Осетиядан олиб чиқиш банди ҳам бўлиши керак. Грузия президенти Саломе Зурабишвили Bloomberg агентлиги билан суҳбатда бу фикрни илгари сурди.
“Россия ўз чегаралари қаерда тугашини билиши керак. Бунда Грузия масалалари ҳам ҳисобга олиниши зарур, шунингдек, ҳеч ким Россия босиб олинган барча ҳудудлардан чекинмасдан туриб бу уруш тугаши мумкинлиги ҳақида ўйламаслиги керак”, — дейди Зурабишвили.
Унинг сўзларига кўра, акс ҳолда Ғарб “2008 ва 2014 йиллардаги каби яна бир катта хатога йўл қўяди”.
Абхазия ва Жанубий Осетия 1990 йиллар бошида СССР парчаланиши фонида ўз мустақиллигини эълон қилганди; ўшандан бери Грузия бу ҳудудларни назорат қилмаган.
Аммо Грузия Абхазия ва Жанубий Осетияни расман Россия босиб олган ҳудудлар деб билади. Россия ҳукумати ҳудудларни ўз таркибига киритиш ниятини очиқ эълон қилмаган бўлса-да, де-факто, улар тўлиқ Москва назорати остида.
Исфаҳонга қилинган дронлар ҳужумининг дастлабки тергов натижалари
Эрон Мудофаа вазирлигининг Исфаҳондаги объектига уюштирилган ҳужум бўйича дастлабки тергов натижалари ҳужум учун Исроил жавобгар эканини кўрсатди. Бу ҳақда Эроннинг Бирлашган Миллатлар Ташкилотидаги доимий вакили Амид Саид Иравоний маълум қилди.
“Дастлабки тергов натижалари сионистик режим Исфаҳон шаҳридаги Мудофаа вазирлиги объектига қилинган теракт учун жавобгар эканини кўрсатмоқда, бу режимнинг ҳаракатлари халқаро ҳуқуққа зиддир ва қораланади”, — дейди Иравоний БМТ бош котиби ва ташкилот Хавфсизлик Кенгаши раисига йўллаган мактубида.
“Эрон ўз миллий хавфсизлигини таъминлаш ва сионистик режим томонидан ҳар қандай таҳдид ёки қонунбузарликларга, агар зарур деб билса, қаттиқ жавоб бериш учун қонуний ва дахлсиз ҳуқуққа эга”, — деб таъкидлади Иравоний. Эрон вакили БМТ Хавфсизлик кенгашини Исроил расмийларининг жанговар баёнотларини қоралашга чақирган.
ОАВ хабарларига кўра, ҳужум ортида Исроил ва АҚШ турган бўлиши мумкин. АҚШ бу портлашларга алоқаси йўқлигини маълум қилди. Исроил эса вазиятга муносабат билдиргани йўқ.
Исроил ва Фаластин ўртасидаги авиазарбалар давом этмоқда
Исроил армияси 2 февраль куни тонгда Фаластиннинг Ғазо сектори марказига авиаҳужум уюштирди, деб хабар бермоқда AFP ва Reuters мухбирлар ҳамда гувоҳларига таяниб.
Маҳаллий хавфсизлик манбалари ва гувоҳларнинг сўзларига кўра, биринчи зарбалар – камида еттита ракета ҲАMASнинг қуролли қаноти – Эзидин ал-Қасам бригадалари ўқув марказига берилган. Объект Ғазо сектори марказидаги Ал-Мағози қочқинлар лагерида жойлашган.
Маҳаллий хавфсизлик манбаларига кўра, Исроил армияси томонидан ҳаво ҳужумларининг иккинчи босқичида Ғазо шаҳрининг жануби-ғарбидаги ал-Қасам бригадалари ўқув маркази нишонга олинган.
Қурбонлар ёки етказилган зарар кўлами ҳақида ҳозирча маълумот берилмаган. The Times оf Israel нашрининг ёзишича, 1 февраль куни Ғазо секторидан Исроил жануби томон ракета учирилган, аммо Ракета “Темир гумбаз” ҳаво мудофаа тизими томонидан тутиб олинган.
Шундан сўнг Исроил ички хавфсизлик вазири Итамар Бен-Гвир ҳукуматни зудлик билан жавоб зарбалари ҳақида муҳокама ўтказишга чақирган.
Айрим сабабларга кўра ёпиб қўйилган ерости иншооти қайта тикланиши мумкин. Ўзбекистонда водийни газ билан таъминлаш имконияти тўлиқ тикланадими?
Шимолий Сўх ерости газ сақлаш иншооти яна қайта ишга туширилиши мумкин. Бу ҳақда Шавкат Мирзиёев Андижон шаҳрида ўтказилган йиғилишда маълум қилди, деб хабар бермоқда ЎзА.
“Афсуски ўз вақтида Сўхдаги ерости газ сақлаш иншооти айрим сабаблар билан ёпиб қўйилган эди. Қирғизистондаги давлат ташрифи чоғида Садир Жапаров билан бу масалада ҳам келишиб олдик. Яқинда энергетика вазиримиз Қирғизистонга бориб, техник томонларини келишиб келади”, — деди президент.
“Шимолий Сўх ерости газ сақлаш иншоотининг ҳажми тахминан 2,5-3 миллиард куб метр атрофида. Шундан 1,3 миллиард куб метр газдан фойдаланиш мумкин, қолгани буфер зонада туради. Бу дегани қиш мавсумида водийни ҳар куни 13 миллион куб метр газ билан таъминлаш имкониятимиз бўлади”, — деган энергетика вазири Жўрабек Мирзамаҳмудов мазкур масала юзасидан ЎзАга берган интервьюсида.
Унинг таъкидлашича, мазкур иншоотнинг асосий газ сақлаш қисми Қирғизистон ҳудудида жойлашган, компрессорлар эса Ўзбекистон ҳудудида. Шу сабабли иншоотдан умумий фойдаланиш борасида музокаралар олиб борилади.
Изоҳ (0)