AQSH uchinchi davlatlarga Amerikaning F-16 qiruvchilarini Ukrainaga yuborishga ruxsat berishi mumkin
AQSH hukumati uchinchi davlatlarga Amerikada ishlab chiqarilgan F-16 qiruvchi samolyotlarini Ukrainaga topshirishga ruxsat berishi mumkin, deb yozmoqda The New York Times. Vashingtonning o‘zi qiruvchilarni jo‘natishi dargumon, dedi Pentagondagi yuqori lavozimli amaldor Politico nashriga.
Katta ehtimol bilan Ukraina Daniya yoki Niderlandiyadan F-16 qiruvchilarini oladi, deydi The New York Times gazetasining Yevropa va Amerika rasmiylari orasidan anonim suhbatdoshlari. Ularning aytishicha, xususan, Niderlandiya ixtiyorida 40 ga yaqin F-16 samolyotlari mavjud. Daniya esa zamonaviyroq F-35 qiruvchilariga o‘tmoqda va F-16 larini Ukrainaga topshirishga tayyorligini bildirgan.
“Bu haqda gapirayotgan boshqa davlatlar ham bor. Ular taklif bilan chiqsagina, biz muzokaralar olib boramiz, deb o‘ylayman”, — dedi AQSH Mudofaa vazirligidagi Politico manbasi. Uning ta’kidlashicha, Pentagon samolyotlar yetkazib berilishiga e’tiroz bildirmaydi, aksincha “buni ustuvor qo‘yishda davom etadi”.
Hozir AQSH rasmiylari Ukrainaga shaharlar va infratuzilma himoyasi uchun havo hujumidan mudofaa vositalarini, shuningdek, kutilayotgan bahorgi hujum uchun zirhli texnika va artilleriya yuborishga ko‘proq e’tibor qaratmoqda, deb yozadi gazeta. Kiyevga qiruvchilar yuborilishi “qanotli raketalar muammosini hal qilmaydi, ular dronlar muammosini hal qilmaydi”, dedi harbiy amaldor. Uning so‘zlariga ko‘ra, hozircha F-16 qiruvchilarini yetkazib berish yuqori darajada muhokama qilinmagan.
Ukraina hukumati AQSH, Germaniya va boshqa davlatlar G‘arb tanklarini Kiyevga berishga rozi bo‘lganidan keyin G‘arbdan qiruvchilar olishga ham urinishni boshladi.
Yanvar oyi oxirida Oq uydagi matbuot brifingida AQSH prezidenti Jo Bayden Vashington Kiyevga F-16 qiruvchilarini yetkazib beradimi, degan savolga “yo‘q” deb javob qaytargandi.
Ukraina Mudofaa vazirligi rahbari Aleksiy Reznikov Baydenning so‘ziga shunday fikr bildirdi: “Barcha turdagi yordam avval ‘yo‘q’ degan bosqichdan o‘tdi. Ikkinchi bosqich — ‘texnik imkoniyatlarni muhokama qilamiz va o‘rganamiz’, uchinchisi — “qani, ekipajingizni tayyorlang’, to‘rtinchisi esa — yetkazib berish bo‘ldi”.
