XVJ 2023-yilda global iqtisodiy o‘sish 2,9 foizgacha pasayishini prognoz qildi
Xalqaro valyuta jamg‘armasi (XVJ) 2023—2034-yillar uchun global iqtisodiy o‘sish prognozlarini e’lon qildi.
“Global iqtisodiy o‘sish 2022-yildagi 3,4 foizdan 2023-yilda 2,9 foizgacha pasayadi, keyin esa 2024-yilda 3,1 foizgacha ko‘tariladi. 2023-yil uchun prognoz oktabr oyidagi prognozdan 0,2 foiz darajaga yuqori, biroq o‘tgan davr (2000—2019) uchun o‘rtacha 3,8 foizdan past”, — deyiladi hisobotda.
Prognozning yaxshilanishiga “kutilmagan ijobiy o‘zgarishlar va ko‘plab mamlakatlardagi kutilganidan kuchliroq chidamlilik darajasi” sabab bo‘lmoqda.
Shu bilan birga, jamg‘arma 2024-yilda jahon iqtisodiyotining rivojlanish sur’atlari bo‘yicha prognozini 0,1 foiz punktga yomonlashtirdi.
Ma’lumotlarga ko‘ra, inflyatsiya va Ukrainadagi urushga qarshi kurashish uchun butun dunyo bo‘ylab Markaziy bank stavkalarining oshishi iqtisodiy faoliyatga bosim o‘tkazishda davom etmoqda.
“Ushbu omillar, shuningdek, Xitoydagi COVID-19 atrofidagi vaziyat 2022-yilda global iqtisodiy faollikni chekladi, ular 2023-yilda ham salbiy ta’sir o‘tkazishda davom etadi”, — deb ta’kidlanadi hisobotda.
Global inflyatsiya 2022-yildagi 8,8 foizdan 2023-yilda 6,6 foizga va 2024-yilda 4,3 foizga tushishi kutilmoqda, bu pandemiyadan oldingi (2017—2019-yillar) taxminan 3,5 foizdan yuqori.
“Moliya bozorlari inflyatsiya haqidagi noxush xabarlarga javoban narxlarni to‘satdan qayta ko‘rib chiqishi mumkin, shu bilan birga keyingi geosiyosiy bo‘linish iqtisodiy taraqqiyotga to‘sqinlik qilishi mumkin”, — deyiladi XVJ hisobotida.
