XBЖ 2023 йилда глобал иқтисодий ўсиш 2,9 фоизгача пасайишини прогноз қилди
Халқаро валюта жамғармаси (XBЖ) 2023—2034 йиллар учун глобал иқтисодий ўсиш прогнозларини эълон қилди.
“Глобал иқтисодий ўсиш 2022 йилдаги 3,4 фоиздан 2023 йилда 2,9 фоизгача пасаяди, кейин эса 2024 йилда 3,1 фоизгача кўтарилади. 2023 йил учун прогноз октябрь ойидаги прогноздан 0,2 фоиз даражага юқори, бироқ ўтган давр (2000—2019) учун ўртача 3,8 фоиздан паст”, — дейилади ҳисоботда.
Прогнознинг яхшиланишига “кутилмаган ижобий ўзгаришлар ва кўплаб мамлакатлардаги кутилганидан кучлироқ чидамлилик даражаси” сабаб бўлмоқда.
Шу билан бирга, жамғарма 2024 йилда жаҳон иқтисодиётининг ривожланиш суръатлари бўйича прогнозини 0,1 фоиз пунктга ёмонлаштирди.
Маълумотларга кўра, инфляция ва Украинадаги урушга қарши курашиш учун бутун дунё бўйлаб Марказий банк ставкаларининг ошиши иқтисодий фаолиятга босим ўтказишда давом этмоқда.
“Ушбу омиллар, шунингдек, Хитойдаги COVID-19 атрофидаги вазият 2022 йилда глобал иқтисодий фаолликни чеклади, улар 2023 йилда ҳам салбий таъсир ўтказишда давом этади”, — деб таъкидланади ҳисоботда.
Глобал инфляция 2022 йилдаги 8,8 фоиздан 2023 йилда 6,6 фоизга ва 2024 йилда 4,3 фоизга тушиши кутилмоқда, бу пандемиядан олдинги (2017—2019 йиллар) тахминан 3,5 фоиздан юқори.
“Молия бозорлари инфляция ҳақидаги нохуш хабарларга жавобан нархларни тўсатдан қайта кўриб чиқиши мумкин, шу билан бирга кейинги геосиёсий бўлиниш иқтисодий тараққиётга тўсқинлик қилиши мумкин”, — дейилади XBЖ ҳисоботида.
