Украина Қуролли кучлари Ғарб берадиган танклардан баҳордаёқ фойдаланишни бошлаши мумкин, деди мамлакат мудофаа вазири Алексий Резников CBC телеканалига берган интервьюсида.
“Умид қиламанки, биз улардан баҳордаёқ фойдаланишни бошлаймиз. Ғарб ваъда қилган танклар билан Украина Қуролли кучларида камида иккита танк баталёнлари ташкил этилади. Улардан қарши ҳужумни давом эттириш учун фойдаланилади”, — деди Резников.
Вазир Ғарб давлатлари Украинага танк етказиб беришда давом этишига ишонч билдирди. “Бу (танкларни етказиб бериш ҳақидаги эълон — “Дарё” изоҳи) ҳикоянинг охири эмас, балки бошланишидир”, — деди у.
Кейинроқ The Washington Post нашри Жо Байден ваъда қилган 31 та Abrams М1А2 танклари Украинага 2023 йилнинг охирида етказиб берилиши мумкинлиги ҳақида хабар берди. Нашр мақоласида айтилишича, танклар АҚШ ҳарбий захираларидан олиб берилмайди, балки Украина хавфсизлигини таъминлаш ташаббуси доирасида сотиб олинади.
Украина ҳукумати узоқ вақтдан бери Ғарб давлатларидан танклар сўраб келаётганди. 25 январь куни АҚШ ҳукумати Киевга 31 та М1 Abrams танкларини топширишини маълум қилди. Ўз навбатида, Германия ҳукумати ҳам Украинага Германия қуролли кучлари захирасидан 14 та Леопард 2 танкини жўнатиши ва бошқа давлатларга реекспорт учун рухсат беришини тасдиқлади. Шу куни Норвегия ва Словакия Мудофаа вазирлиги ҳам танкларни Украинага ўтказиш нияти борлигини маълум қилди. Аввалроқ Киевни танклар билан таъминлаш қарори Буюк Британия, Франция ва Польша расмийлари томонидан эълон қилинганди.
Изоҳ (0)