Qirg‘iziston-O‘zbekiston chegarasida kontrabandachilar foydalanayotgan omborxona topildi

Qirg‘iziston va O‘zbekiston chegarasidagi “Do‘stlik” nazorat-o‘tkazish punkti yaqinida kontrabandachilar foydalanayotgan omborxona topildi. Bu haqda 24.kg xabar berdi.

Ma’lum qilinishicha, omborda turli xil bolalar kiyimlari bo‘lib, har biri 25-30 kilogrammdan 27 o‘ramdan iborat mahsulot aniqlangan.

“Savdo-sanoat palatasi O‘sh viloyat boshqarmasi xulosasiga ko‘ra, tovarning umumiy qiymati 901 ming 200 somni tashkil etadi. Yuk bojxona rasmiylashtiruvini tasdiqlovchi hujjatlarsiz saqlangan”, — deyiladi xabarda.

Tovar egasi Qirg‘iziston fuqarosi bo‘lib, qo‘lga olingan mahsulot saqlash uchun jo‘natilgan. Materiallar Qirg‘iziston transport prokuraturasiga o‘tkazilgan.

Noyabr oyida Qirg‘izistonda xalqaro narkoguruh a‘zolari qo‘lga olingandi, ular orasida O‘zbekiston fuqarosi aniqlangan.