Erondagi obyektlarga berilgan zarbalarga AQSH harbiylarining hech qanday aloqasi yo‘q. Bu haqda Pentagon matbuot kotibi Patrik Rayder ma’lum qildi, deb xabar bermoqda Reuters.
Amerika harbiy idorasining vakili batafsilroq izoh berishdan bosh tortdi.
AQSHning zarbalarga aloqasi yo‘qligi haqida Reuters’ga boshqa amerikalik rasmiylar ham aytgandi. Agentlikning ismi oshkor etilmagan rasmiylarga tayanib yozishicha, AQSH bo‘lib o‘tgan voqeada Isroilni ayblamoqda.
Isfahondagi sanoat majmuasiga hujum haqida Eron Mudofaa vazirligi 29-yanvar kuni ertalab xabar berdi. Vazirlik maʼlumotlariga koʻra, uchta drondan zarba berilgan. Ulardan bittasi havo hujumidan mudofaa tizimi yordamida urib tushirilgan, yana ikkitasi “mudofaa tuzog‘iga” tushib, portlab ketgan.
Vazirlik xabariga ko‘ra, hujum paytida faqat harbiy korxona sexlaridan birining tomi biroz shikastlangan. Keyinchalik Eronning davlat mudofaa majmuasiga aloqador yana bir qancha zavodlarida portlashlar sodir bo‘ldi.
Al-Arabia telekanalining yozishicha, Isroil Eron harbiy sanoatini yo‘q qilish uchun ushbu mamlakat hududida maxsus harbiy amaliyot boshlagan. Isroil tomoni bu xabar yuzasidan munosabat bildirmagan.
Keyinroq OAV Isfahondagi harbiy obyektga uyushtirilgan dronlar hujumida AQSH harbiy-havo kuchlari va yana bir davlat aybdor ekani haqida yozdi.
Izoh (0)