Andijonda kuniga 200 nafar fuqaroga xizmat ko‘rsatish imkoniyatiga ega davlat xizmatlari markazi foydalanishga topshirildi

Andijonda o‘n oltinchi davlat xizmatlari markazi binosi foydalanishga topshirildi. Adliya organlarining barchasi ushbu binoda joylashtirilgan. Bu haqda “Daryo” muxbiri Umidjon Mamarasulov xabar bermoqda.

Viloyat adliya boshqarmasi axborot xizmatining ma’lumot berishicha, mazkur markazning avvalgi binosi o‘ta ta’mirtalab holga kelib qolgan bo‘lgan. Shu sabab bino ayni kundagi talablarga javob bermagan va fuqarolarga noqulayliklar tug‘dirgan.

Markaz qurilishi zamonaviy shaharsozlik me’yorlariga mos keladi, fuqarolar va yuridik shaxslar uchun keng sharoitlar yaratilishiga alohida e’tibor qaratilgan. Markazda elektron navbat tizimi, ma’lumot kioski, o‘z -o‘ziga elektron xizmatlar olish burchagi, investorlar, ID-karta va xorijga chiqish biometrik pasportini berish xonasi, bank shoxobchasi joylashgan. Shu jumladan, markazga kelgan fuqarolarning erkin davlat xizmatlaridan foydalanishining turli imkoniyatlari haqida xabardorligini oshirish maqsadida ma’lumotnoma stendlari va ko‘rgazmali plakatlar o‘rnatilgan.

Bundan tashqari, davlat xizmatlaridan eksterritorial asosida, ya’ni yashash va ro‘yxatdan o‘tgan manzilidan qat’i nazar foydalanishi mumkin. Bu yerda 190 ga yaqin davlat xizmatlaridan foydalanish imkoniyati yaratilgan. Markazda bir vaqtning o‘zida 10 nafar, bir kunda 200 nafar fuqaroga xizmat ko‘rsatish imkoniyati yaratilgan, — deydi boshqarma axborot xizmati mas’uli.

Qo‘shimcha qilinishicha, ushbu imoratda adliya bo‘limi, yuridik xizmat ko‘rsatish markazi, Fuqarolik holati dalolatnomasini yozish bo‘limi va davlat xizmatlari markazi joylashgan bo‘lib, hudud aholisiga qulaylik yaratadi.