«Тошкент шаҳрида транспорт инфратузилмасини янада ривожлантириш ва йўл ҳаракатини рақамли бошқариш тизимини жорий этишга доир қўшимча чора-тадбирлар тўғрисида»ги президент қарори лойиҳаси эълон қилинди.
Унда қайд этилишича, кўрилаётган чора-тадбирларга қарамасдан, автомобиль йўлларида йўл ҳаракати иштирокчилари томонидан содир этилаётган қоидабузарликлар ва оғир оқибатларга олиб келаётган ЙТҲлар сони ҳали ҳам юқорилигича қолмоқда. Бу ўз навбатида шаҳарда йўл ҳаракати хавфсизлигини таъминлаш тизимини комплекс ислоҳ қилиш зарурлигини кўрсатмоқда.
Жумладан, транспорт инфратузилмасини ҳаракат хавфсизлигини таъминлашнинг замонавий талабларига тўлиқ мувофиқлаштириш, тирбандлик юқори бўлган чорраҳалар ва автомобиль йўлларида марказлашган рақамли бошқариш тизимини жорий этиш ва бу орқали тирбандликлар сонини камайтириш, ушбу соҳадаги қоидабузарликларни самарали аниқлаш тизимини йўлга қўйиш, автомобиль йўллари бўйлаб тартибга солинган йўл бўйи пуллик автомобиль тўхташ жойларини ташкил қилиш, шунингдек, жамоат транспортининг устуворлигини таъминлаш талаб этилмоқда.
Шу муносабат билан «Тошкент шаҳар тирбандлик юқори бўлган кўчаларида ўтказувчанлик қобилиятини ошириш, транспорт оқимларини самарали бошқаришни жорий этиш ва йўл ўтказгичлари қуриш концепцияси» тасдиқланади.
Унга кўра қуйидаги чоралар амалга оширилади:
- чорраҳалар ва автомобиль йўлларидан ўтаётган транспорт воситалари ҳаракатини самарали бошқариш ва тақсимлаш тизимини яратиш орқали тирбандликлар юзага келишини олдини олиш ва уларнинг сонини кескин камайтириш;
- автомобиль йўллари инфратузилмасини такомиллаштиришда жамоат транспорти ҳаракати устунлигини таъминлаш орқали жамоат транспортининг жозибадорлигини ошириш ва шаҳар марказида ҳаракатланаётган енгил автотранспорт воситаларининг сонини 20 фоизгача қисқартириш;
- тартибга солинган йўл бўйи пуллик автомобиль тўхташ жойлари тизимини ташкил этиш орқали пуллик автомобиллар тўхташ жойлари сонини кўпайтириш ва бевосита шахсий автотранспорт воситаларидан фойдаланиш даражасини камайтириш;
- чорраҳалар геометрик параметрларини ўзгартириш йўли билан автотранспорт воситаларининг ўтказувчанлигини 15 фоизга ошириш, автотранспорт воситаларидан атроф табиий муҳитга етказилаётган зарарлар миқдорини 35 фоизгача камайтириш;
- йўл ўтказгичлар ва чорраҳаларни лойиҳалаш ва қуришда замонавий технологияларини татбиқ этиш орқали рақамлаштириш кўрсаткичини 90-95 фоизга кўтариш;
- автотранспорт воситалари оғирлиги ва габарити назорати бўйича стационар шохобчалари тизимини яратиш орқали шаҳар йўллари бўйлаб юк ташувларини тартибга солиш.
Ушбу йўналишда жамоат транспорти жозибадорлигини ошириш 2 та асосий кўрсаткич: вақт ва нарх бўйича жозибадорлик аҳоли танловида ҳал қилувчи омил ҳисобланади.
Шахсий транспорт ёки таксида манзилга етиб борадиган аҳоли учун барқарор жамоат транспортида ижтимоий тарифлардан фойдаланиш имкониятини тақдим этиш орқали жамоат транспортининг устуворлиги таъминланади.
Бунда вақт кўрсаткичи бўйича устуворлик ҳамда жамоат транспорти барқарорлигини таъминлаш, автобусларга алоҳида йўлак орқали тўсиқсиз ҳаракатланиш имконини беришдан бошлаб, чорраҳаларда ҳаракатни ташкил этишда автобус йўлаклари учун алоҳида фазалар, автобусларга алоҳида йўлак ажратиш имконияти мавжуд бўлмаган чорраҳаларда автобусларнинг ҳаракат жадвалига мувофиқ яшил чироқ тамойилини жорий этиш, шунингдек, аҳоли гавжум объектларга пиёда кириш учун энг қулай жойларда бекатларни жойлаштириш каби тадбирлар тизимли равишда амалга оширилади.
Изоҳ (0)