Непал пойтахти Катмандудан Похара шаҳрига учаётган ATR 72 йўловчи самолётининг қулашига техник носозлик сабаб бўлиши мумкин. Бу ҳақда My Republica хабар берди.
Непал фуқаро авиацияси маъмурияти вакили Гянендра Бхул бу бўйича маълумот берган.
«Об-ҳаво билан боғлиқ ҳеч қандай муаммо йўқ эди, дастлабки маълумотларга кўра, самолёт техник сабаблар туфайли ҳалокатга учраган. Самолёт ҳавода бўлганида аланга қайд этилгани ҳақида маълумот олинган», — деди Бхул.
Самолётнинг қулашига аниқ нима сабаб бўлганини Непал расмийлари 45 кун ичида тайёр бўладиган махсус комиссия ҳисоботида эълон қилади.
Непалдан учган ATR 72 йўловчи самолёти 15 январь куни Непал пойтахти Катмандудан Похарага парвоз қилган ва қўниш чоғида ҳалокатга учраган. Парвозни амалга оширган Yeti Airlines авиакомпаниясининг барча 68 йўловчиси ва 4 нафар экипаж аъзоси ҳалок бўлган.
Йўловчилар орасида: 53 нафар непал, беш нафар ҳинд, тўрт нафар рус, икки нафар корейс, Ирландия, Аргентина, Австралия ва Франциядан биттадан фуқаро бўлган. Ҳолат юзасидан Непал ҳукумати бир кунлик миллий мотам эълон қилган. Франциянинг АFP агентлиги Каски тумани раҳбари ўринбосари Гурудатта Дхакалга таяниб, авиаҳалокатда тирик қолганлар борлигини айтмоқда.
Nepal News нашри хабарларига кўра, воқеа жойида 68 кишининг жасади топилган, тўрт киши бедарак йўқолган деб ҳисобланмоқда.
Изоҳ (0)