O‘zbekiston prezidentining Singapurga rasmiy tashrifi arafasida bo‘lib o‘tgan ikki davlat tadbirkorlari o‘rtasidagi ishbilarmonlik aloqalarini har tomonlama mustahkamlashga qaratilgan O‘zbekiston—Singapur biznes-forumida “O‘zto‘qimachiliksanoat” uyushmasi raisi Ilhom Haydarov intervyu berdi.
Uning so‘zlariga ko‘ra, Singapurga tashrif uchun yillar davomida tayyorgarlik ko‘rib kelingan.
“Hammaga ma’lumki, Singapur dunyoning eng katta moliyaviy va biznes markazi hisoblanadi. Bu yerda katta korporatsiyalarning shtab-kvartiralari joylashgan. Ko‘plab kompaniyalar bilan bitimlarni yangilash va kengaytirishga erishdik. 2023-2024-yillarda qariyb 110 million dollarlik to‘qimachilik mahsulotlarini eksport qilishga kelishib oldik. To‘qimachilik mahsulotlarini nafaqat Singapurga, balki Yevropa davlatlariga ham eksport qilish bo‘yicha bitim tuzdik”, — deydi u.
Ta’kidlanishicha, Singapur — IT-texnologiyalar yirik platformasi sanaladi.
“Biz LendingStar kompaniyasi bilan alohida platforma yaratishga kelishdik. Mahsulotlarimiz shu platforma orqali sotiladi va faktoring uslubida moliyalashtirish imkoniga ham ega bo‘lamiz”, — deydi Ilhom Haydarov.
Izoh (0)