O‘zbekistonning qator viloyatlaridagi bog‘cha va maktablarda qishki ta’til muddati yana uzaytirildi

Farg‘ona, Buxoro, Sirdaryo viloyatlaridagi bog‘cha va maktablarda qishki ta’til 18-yanvargacha uzaytirildi.

Farg‘ona viloyati hokimligi matbuot xizmatining bildirishicha, mahalliy davlat hokimiyati organlarining ta’lim sohasidagi vakolatlariga asoslanib, viloyat hududida sovuq ob-havo sharoiti saqlanib qolayotganidan kelib chiqib, viloyatdagi 975 ta umumta’lim maktablarida, prezident, ijod va ixtisoslashtirilgan maktablarda hamda barcha maktabgacha ta’lim muassasalarida qishki ta’til uzaytirildi.

O‘quv mashg‘ulotlari 18-yanvar, chorshanba kunidan boshlanadi. Bundan avval qishki ta’til 16-yanvarga qadar davom etishi belgilangandi.

Buxoro viloyati hokimligi matbuot xizmati xabarida shu sababga ko‘ra ta’til muddati 18-yanvargacha uzaytirilgani qayd etilgan.

Sirdaryo viloyati hokimligi matbuot xizmatining ma’lum qilishicha, viloyatdagi mavjud 325 ta maktab va 199 ta bog‘chada dars hamda mashg‘ulotlar 18-yanvardan boshlanishini belgilash qarori nafaqat ta’lim muassasalari ma’muriyati, balki ota-onalar va pedagogik tarkib bilan maslahatlashilgan holda qabul qilindi.