«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 14-сони мавзуси «Аёлнинг гапи — гап» бўлиб, дастур меҳмони сифатида журналист, «Анҳор» интернет нашри бош муҳаррири Лола Исломова таклиф этилди.
Лола Исломова ўзбек оиласидаги аёлнинг ўрни ҳақида гапирар экан, мамлакатда жасур ва матонатли аёллар кўплигига тўхталди.
— Бизда шунақа гаплар бор: «Бу аёлнинг иши, бу эркакнинг иши эмас, болангни ол (гўё унинг боласи эмас)». Лекин ёш оилаларни кузатиб жуда хурсанд бўламан, чунки ҳозирги оталар боласига кўпроқ аҳамият беради, тарбиясига кўпроқ вақт ажратади. Аввал оталар кўп ишлаган, иш қийинроқ бўлганмикан, балки.
Оилада аёлларга катта қўллаб-қувватлаш керак. Жаннат оналар оёғи остида, дейилади. Лекин негадир бу гапни негадир онамиз кексайганда, бир нечта касалликни орттириб олганда эслаб қоламиз. Ёш аёллар ҳам она-ку! Бизда уларни оёқости қилишади, лекин бетоб бўлиб, ёши улғайганда ҳурмат кўрсата бошлашади. Шунинг учун ёши ва жинсидан қатъи назар ҳар бир инсонни ҳурмат қилиш керак.2018 йилда Замонавий журналистикани ривожлантириш марказини очганмиз ва вилоятлардаги журналист-блогерлар учун мунтазам тренинглар ўтамиз. Вилоятларда турли инсонлар билан танишишни жуда яхши кўраман. Ўтган йили 50 нафар аёлдан интервью олдим, уларнинг орасида механизатор, ўқитувчидан тортиб, юқори лавозимда ишлайдиганларгача бор эди. Бизда шундай аёллар борки, ҳайрон бўласиз. Масалан, Навоийда бир аёл 69 нафар бола асраб олган. Водийлик бир аёл Умрага йиғган пулига кўприк қурган.
Журналистлар гўёки прожектор, камчиликни кўрсатиши, муаммони ечиши керак. Ҳозир аксарият оммавий ахборот воситалари ўзига кўпроқ обуначи жалб қилиш учун айнан салбий мазмундаги мавзуларни ёритяпти. Бизда сифатли журналистика, афсуски, жуда кам. Жамиятдаги муаммоларнигина эмас, шундай қаҳрамон инсонларни ҳам аудиторияга кўрсатиш керак, — дейди журналист.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)