Рим шаҳридаги Ўзбекистон дипломатия ваколатхонасида Италия қишлоқ хўжалиги уюшмаси президенти Жанфранко Гречи билан учрашув бўлиб ўтди, деб хабар бермоқда «Дунё» ахборот агентлиги.
Қайд этилишича, Жанфранко Гречи Ўзбекистон қишлоқ хўжалиги вазирлиги билан ўрнатилган алоқаларни қадрлашини билдирган. 2022 йилда ваколатхона кўмагида қатор делегациялар билан самарали мулоқот олиб борилганини таъкидлаган.
Жанфранко Гречи, шунингдек, Италия қишлоқ хўжалиги вазирлиги ва уюшма етакчилигида жорий йил май ойида Неапол шаҳрида ўтказиладиган «Mediterraneo Wine&Food and Travel» озиқ-овқат халқаро кўргазмасига тайёргарлик ишлари бошланганини маълум қилган.
«Ушбу кўргазмада Лотин Америкаси, Европа ва Яқин Шарқ минтақасидан 20 дан ортиқ давлатнинг иштирок этиши режалаштирилмоқда. Тадбирда турли мамлакатларнинг озиқ-овқат маҳсулотлари намойиш қилиниши билан бирга юқори даражадаги расмий учрашувларни ўтказиш ҳам назарда тутилмоқда. Бугунги кунда кўргазма концепцияси ишлаб чиқилмоқда. Ушбу халқаро тадбир Ўзбекистон қишлоқ хўжалиги маҳсулотларини дунёга янада яқиндан танитиш, шунингдек, Италия қишлоқ хўжалиги соҳаси вакиллари билан ўзаро алоқаларни мустаҳкамлаш учун яхши имконият бўлиши мумкин», — деди Жанфранко Гречи.
Учрашув якунида Неапол шаҳрида бўлиб ўтадиган «Mediterraneo Wine&Food and Travel» озиқ-овқат халқаро кўргазмасида Ўзбекистон вакилларининг иштирокини пухта ишлаб чиқишга келишиб олинган.
Изоҳ (0)