Ijtimoiy tarmoqlarda Andijon viloyatida fuqarolar mashinaga chana bog‘lab, xavfsizlik qoidalariga amal qilmagan holda chana uchayotani aks etgan videolavha tarqaldi. Viloyat Ichki ishlar boshqarmasi holatga munosabat bildirdi.
Qayd etilishicha, 11-yanvar kuni soat 01:00 larda Andijon shahrida yashovchi fuqaro S.K. shaharning O‘zbekiston ko‘chasida 2 nafar tanishi A.A. va Q.Sh. bilan birga qorda sirpanish maqsadida o‘zining boshqaruvida bo‘lgan Lacetti avtomashinasining orqasiga arqon yordamida chana bog‘lab, katta yo‘lda xavfli harakatlarni sodir etgan.
Haydovchi va chana ustida bo‘lgan 2 nafar fuqaroga hech qanday tan jarohati yetmagan.
Holat yuzasidan Ma’muriy javobgarlik to‘g‘risidagi kodeksning tegishli moddasi tartibida bayonnoma rasmiylashtirilgan.
“Shu o‘rinda barcha yo‘l harakati ishtirokchilaridan noqulay ob-havo sharoitida belgilangan qoidalarga qat’iy amal qilishlarini, yo‘llarda xavfli harakatlarni sodir etish orqali o‘zi va boshqalarning hayotini xavf ostiga qo‘ymasliklarini so‘rab qolamiz”, — deyiladi xabarda.
Izoh (0)