13-yanvar kuni O‘zbekiston prezidenti Shavkat Mirziyoyev Mudofaa vazirligining Markaziy harbiy klinik gospitaliga tashrif buyurdi.
Gospitalda 700 o‘rinli davolash bo‘limlari soni 27 ta, tibbiy ta’minot va diagnostika bo‘limlari soni 11 ta, ta’minot bo‘limlari va xizmat turlari soni 15 ta.
Muassasada 938 nafar Qurolli Kuchlar ishchi va xizmatchilari faoliyat ko‘rsatadi. Jumladan, vrachlar – 166 nafar, o‘rta tibbiyot xodimlari (tibbiy hamshira, laborant, rentgenlaborant) – 421, kichik tibbiy xodimlar – 115 nafar.
Gospitalda 6 nafar ilmiy darajali xodim ishlaydi, ulardan 1 nafari fan doktori, 5 nafari fan nomzodi. Shuningdek, xalqaro musobaqalar, davlat mukofotlari sovrindorlari ham faoliyat ko‘rsatmoqda.
Prezidentning 2020-yil 22-oktyabrdagi “Harbiy tibbiyot sohasida kadrlarni tayyorlashning sifat jihatidan yangi tizimini tashkil etish chora-tadbirlari to‘g‘risida”gi qaroriga muvofiq, mazkur fakultet negizida O‘zbekiston Respublikasi Qurolli Kuchlari Harbiy tibbiyot akademiyasi tuzildi. Ushbu ta’lim maskani Markaziy harbiy klinik gospital yonida qurildi. Prezident bu yerdagi sharoitlarni ham ko‘zdan kechirdi.
Akademiya 250 nafar talaba va tinglovchiga mo‘ljallangan. Bu yerda bo‘lajak harbiy shifokorlar o‘qitiladi hamda tibbiyot xodimlari qayta tayyorlanadi. O‘quv binosida 2 ta fakultet, 5 ta kafedra, 2 ta markaz, institut va ma’muriyat joylashgan. Xonalarda o‘quv va mashg‘ulotlar uchun barcha sharoit yaratilgan. 186 o‘rinli yotoqxona ham bor. Davlat rahbari akademiyadagi ta’limning mazmuniga alohida ahamiyat qaratdi.
“Bino va sharoitlar yaxshi, lekin bu ishning boshlanishi. Endi asosiysi harbiy tibbiyotning mazmunini, mohiyatini tushunib, o‘qishni to‘g‘ri yo‘lga qo‘yish kerak. Buning uchun xorij tajribasi asosida pedagogik, ilmiy va amaliy tizim yaratish zarur. Bu tizim boshqa tibbiyot oliy o‘quv yurtlariga muqobil va raqobatchi, bitiruvchilar o‘z yo‘nalishi bo‘yicha namuna bo‘lishi kerak”, — dedi Shavkat Mirziyoyev. Akademiyada xorijiy boshqaruvni joriy etish, ilk bitiruvchilarni Turkiya va Janubiy Koreya kabi mamlakatlarga malaka oshirishga yuborish bo‘yicha ko‘rsatmalar berildi.
Izoh (0)