Ижтимоий тармоқларда Андижон вилоятида фуқаролар машинага чана боғлаб, хавфсизлик қоидаларига амал қилмаган ҳолда чана учаётани акс этган видеолавҳа тарқалди. Вилоят Ички ишлар бошқармаси ҳолатга муносабат билдирди.
Қайд этилишича, 11 январь куни соат 01:00 ларда Андижон шаҳрида яшовчи фуқаро С.К. шаҳарнинг Ўзбекистон кўчасида 2 нафар таниши А.А. ва Қ.Ш. билан бирга қорда сирпаниш мақсадида ўзининг бошқарувида бўлган Lacetti автомашинасининг орқасига арқон ёрдамида чана боғлаб, катта йўлда хавфли ҳаракатларни содир этган.
Ҳайдовчи ва чана устида бўлган 2 нафар фуқарога ҳеч қандай тан жароҳати етмаган.
Ҳолат юзасидан Маъмурий жавобгарлик тўғрисидаги кодекснинг тегишли моддаси тартибида баённома расмийлаштирилган.
«Шу ўринда барча йўл ҳаракати иштирокчиларидан ноқулай об-ҳаво шароитида белгиланган қоидаларга қатъий амал қилишларини, йўлларда хавфли ҳаракатларни содир этиш орқали ўзи ва бошқаларнинг ҳаётини хавф остига қўймасликларини сўраб қоламиз», — дейилади хабарда.
Изоҳ (0)