Ўзбекистон Мусулмонлари идораси раисининг биринчи ўринбосари Ҳомиджон домла Ишматбеков фуқароларни фолбинларга боришдан қайтариб, бу Ислом динида тақиқланган амал эканини айтди.
Фолбинга бориш — динимиз қайтарган амал, энг оғир гуноҳ, инсонни иймондан айирадиган, мўминни диндан чиқарадиган иш. Фолбинлик — бу Аллоҳ таолога хос бўлган ғайбни билишга даъво қилиш демакдир.Фолбинлик — ёлғончилик, Аллоҳ номидан ёлғон тўқишлик. Пайғамбаримиз «Ёлғончи менинг умматим эмас», деганлар. Фолбинларда айнан мана шу хислат мужассам.
Чунки аслида улар айтаётган гапнинг ҳақиқати йўқ. Баъзи инсонлар пайғамбаримизга бориб, «Расуллуллоҳ, фолбинларнинг баъзи гаплари рост чиқиб қолади-ку?», деганларида, у зот «Жин, шайтонлар фолбинга олиб келиб, хабарларни етказганда ўзидан яна 99 тани қўшиб, 100 та нарсани айтади. Шу учун орасида фаришталардан эшитиб қолган баъзи бир хабарларигина тўғри чиқиб қолиши мумкин. Бу сизларни чалғитмасин», — деганлар.
Мўмин-мусулмонлар ҳар қандай эҳтиожи, талаби бўлса, дуони ижобат қилгувчи, эҳтиёжни тўла-тўкис қондиргувчи, «Дуо қилинг, ижобат қиламан» деган ваъдасини берувчи Аллоҳга илтижо қилиши керак.
Айниқса, бизда аёл кишилар орасида бирор мушкулини кўтаришни сўраб, фарзандларининг бахти очилишини сўраб фолбинларга бориш ҳолатлари мавжуд. Аввало, ҳар ким ўзи учун ўзи жавоб беради. Лекин Аллоҳ эркакларни аёлларга раҳбар қилган, оилада бош қилган. Ана шундай гуноҳга борган пайтда эркак аёлини тўхтатиши керак, уларга насиҳат қилиши керак.
Фолбинларга айтадиганимиз, бу касбингизни ташланг, пулини етимларга тарқатиб юборинг. Ҳалол касб қилишга ўтинг. Қачонгача мусулмонларни алдайсиз, оилангизга ҳаром едирасиз?, — дейди Ҳомиджон Ишматбеков.
Изоҳ (0)