Россия аҳолисига «ватанпарварлик», «қадриятлар» ҳақида гапирадиган россиялик амалдор, депутат ва хавфсизлик ходимларининг фарзандлари НАТО ва Европа Иттифоқи мамлакатларида дам олишни афзал кўради. The Insider нашри улар ҳақида маълумот берди.
Санкцияга киритилган Россия амалдорларнинг фарзандлари НАТО ва Европа Иттифоқи мамлакатларига ташриф буюришда давом этмоқда, Украина билан уруш олиб бораётган сиёсатчиларнинг фарзандлари орасида Дубай, Бали, Мальдив ва Сейшел ороллари машҳур дам олиш масканлари ҳисобланади.
Сергей Наришкиннинг қизиРоссия Ташқи разведка хизмати раҳбари Сергей Наришкиннинг қизи Вероника Европа курортларида дам олишни яхши кўради. Унинг ота-онаси Шимолий Атлантика альянси томонидан Россияга таҳдидлар ҳақида гапирар экан, Вероника НАТО аъзоси бўлган Туркияга ташриф буюришни афзал кўради. Шунингдек, дугонаси, «Локомотив» клуби ва Россия миллий терма жамоасининг собиқ футболчиси Алексей Косолаповнинг қизи, билан Италия ва Греция пляжларида вақт ўтказади.
2022 йил охирида улар Балига йўл олган ва у ерда AYANA Resort Bali меҳмонхонасида қолган. Меҳмонхонада бир кунлик дам олиш 500 доллардан ошади.
The Insider’га кўра, Вероника дунё бўйлаб хавфсиз ҳаракатлана олади, чунки Наришкинлар оиласи АҚШ ва Европа Иттифоқининг санкциялар рўйхатига киритилмаган.
Сергей Шойгунинг қизи
«Украинада НАТО мамлакатларига қарши жанг қилаётгани»ни айтаётган Россия мудофаа вазирининг қизи Ксения Шойгу турмуш ўртоғи, блогер Алексей Столяров билан биргаликда Янги йилни Бирлашган Араб Амирликларида ўтказди. Жуфтлик Дубайдаги Caesars Palace Dubai меҳмонхонасида қолди. Журналистларнинг сўзларига кўра, у ердаги таътил эр-хотинга камида 500 минг рублга (7 283 доллар) тушган.
The Insider 2022 йилгача Ксения Шойгу Capital Perform инвестиция компаниясига эгалик қилгани ва у орқали давлат пулларини ўзлаштирганини таъкидламоқда. Компания давлат муассасалари ҳайдовчиларини пуллик тиббий кўрикдан ўтказган, шунингдек, Россияда стадионлар, кўприклар ва йўллар қуриш учун субпудратлар олган.
Сенатор Жабаровнинг ўғли
Федерация Кенгашининг Халқаро ишлар бўйича қўмитаси раисининг биринчи ўринбосари Владимир Жабаров ўзининг Америкага қарши чиқишлари билан танилган. Бироқ, унинг ўғли Александр АҚШга саёҳат қилишни яхши кўриши маълум бўлди.
Кичик Жабаровнинг Instagram саҳифасида Сан-Франсиско ва Лос-Анжелесдан олинган суратлар бор. Россиялик сиёсатчининг ўғли Украинадаги уруш пайтида Европа мамлакатлари — Норвегия ва Швецияда дам олган. Яқинда у Туркия ва Дубайга ҳам ташриф буюрган. Жабаровнинг ўғлига нисбатан санкциялар қўлланилмаган.
Спикер Валентина Матвиенко ва вице-спикер Александр Жуковнинг келинлари
Россия Федерация Кенгаши спикери Валентина Матвиенконинг келини Юлия Италиядаги оилавий виллада дам олишни афзал кўради, шунингдек, Камбоджа ва Туркияда вақт ўтказади. Янги йил байрамлари учун у Мальдив оролларига учиб кетган ва у ерда Waldorf Astoria Maldives Ithaafushi меҳмонхонасида қолган. У ерда бир кеча тахминан 3 минг еврога баҳоланади.
Давлат Думаси вице-спикери Александр Жуковнинг келини кузда Грециянинг Миконос оролида кўриниш берган. У Индонезиянинг Бали оролида Янги йилни нишонлаган.
Россия Бош штаб бошлиғининг келини
Россия Бош штаби раҳбари Валерий Герасимовнинг келини Алена Украинанинг Қримида дам олмоқда, гарчи бу яриморолни босиб олиш пайтида ноқонуний ҳисобланади. Унинг ижтимоий тармоқларидаги аккаунтида Алушта шаҳридаги Porto Маrе меҳмонхонасидан олинган фотосурати мавжуд.
Изоҳ (0)