Toshkentda tez yordam haydovchilari qoidabuzarliklar uchun jarima qog‘ozlari kelayotgani sabab videomurojaat bilan chiqqandi. Poytaxt IIBB matbuot xizmati ushbu videomurojaat yuzasidan tergovga qadar tekshiruv boshlanganini ma’lum qildi.
Ijtimoiy tarmoqlarda tarqalgan ushbu videomurojaatda haydovchilar chaqiruv bo‘yicha harakatlangan vaqtida yo‘l qo‘yilgan qoidabuzarliklar, xususan, tezlikni oshirish, “polosa”ni bosish, qizil chiroqda o‘tib ketganlik uchun jarima qog‘ozlari kelayotganidan shikoyat qilingandi.
Mazkur holatni batafsil o‘rganish maqsadida 10-yanvar kuni Toshkent shahri bo‘yicha tez tibbiy yordam xizmati garajida matbuot anjumani o‘tkazildi. Unda Respublika tez tibbiy yordam markazi rahbariyati va yo‘l harakati xavfsizligi mas’ullari ham ishtirok etgan.
Respublika tez tibbiy yordam markazi rahbari Abduvoitjon G‘afurov Toshkent shahri bo‘yicha tez tibbiy yordam xizmati avtoparkidagi texnik xodim o‘z vazifasini yuklab qo‘ygani ortidan e’tirozlar yuzaga kelganini ta’kidlab o‘tgan. “Xodim jarima qog‘ozlarini tahlil qilib, yopishi kerak, sizlarning qo‘lingizga tutqazishi kerak emas. Agar ishdan tashqari vaqtda qoida buzgan bo‘lsangiz, unda javobgarlikka tortilasiz”, — degan u matbuot anjumanida qatnashgan tez yordam haydovchilariga qarata.
Poytaxt IIBB matbuot xizmatining ma’lum qilishicha, ayni paytda tez tibbiy yordam xizmati haydovchilari tomonidan chiqarilgan videomurojaat yuzasidan Uchtepa tumani IIO FMB tomonidan tergovga qadar tekshiruv o‘tkazilmoqda.
Tekshiruv jarayonida har bir ishtirokchidan tushuntirish xatlari olingan, ularning vajlari to’liq tekshirilib, holat har taraflama o‘rganiladi.
Tergovga qadar tekshiruv yakuniga ko‘ra qonuniy qaror qabul qilinishi ta’minlanadi.
Izoh (0)