«Вагнер» хусусий ҳарбий компанияси асосчиси Евгений Пригожин даъво қилишича, унинг бўлинмалари Донецк вилоятидаги Соледар шаҳрини тўлиқ назорат остига олган.
«‘Вагнер’ бўлинмалари Соледарнинг бутун ҳудудини назорат остига олди. Шаҳар маркази қуршовга олинди, у ерда жанглар олиб борилмоқда. Асирлар сони эртага маълум қилинади. Яна бир марта таъкидлайман, Соледарга ҳужумда ‘Вагнер’ жангчиларидан бошқа ҳеч қандай бўлинмалар иштирок этгани йўқ», — деб маълум қилган эди Пригожиннинг матбуот хизмати 10 январь куни кечқурун.
Американинг Урушни тадқиқ қилиш институти 10 январь кунги маълумотида ёзишича, Россия қўшинлари Соледарни тўлиқ истило қилишга муваффақ бўлганича йўқ, чунки шаҳарда, Пригожиннинг ўзи ёзганидек, ҳали ҳам жанглар давом этмоқда. Кўча жанглари вақтида вазият жуда тез ўзгариши мумкинлиги туфайли, у ёки бу даҳаларни айнан ким назорат қилаётганини айтишга эрта, деб ҳисоблайди экспертлар.
Украина расмий маъмурлари вазиятни изоҳлаганича йўқ. Украина қуролли кучлари Бош штабининг эрталабки ахборотида Соледар Россия армияси томонида ўққа тутилишда давом этаётган аҳоли пунктлари қаторида тилга олинган, холос.
Аввалроқ Украина қуролли кучларининг Соледарни мудофаа қилаётган 46-аэромобил бригадаси жангчиларидан бири CNN билан суҳбатда шаҳардаги вазиятни «жиддий» деб атаб, «ҳалок бўлганлар шунчалик кўпки, уларни энди ҳеч ким санамаяпти» деган эди.
Соледар — Донецк вилоятидаги кичик шаҳар бўлиб, сўнгги вақтларда у учун шафқатсиз жанглар бормоқда. Унинг қўлдан бой берилиши Украина қўшинлари учун анча каттароқ бўлган Бахмут шаҳри мудофаасини қийинлаштириши мумкин, унга эса бир неча ойлардан буён россияликлар томонидан ҳужум олиб борилмоқда.
Изоҳ (0)