Жиззах ва Сурхондарёда 11 январдан бошлаб мактаблар очилиши хабар берилди. Сурхондарёлик масъуллар буни тасдиқлаган бўлса, жиззахликлар рад этди

Жиззах ва Сурхондарё вилоятида халқ таълими масъуллари мактаб директорларига Telegram орқали хабар йўллаб, 11 январдан бошлаб умумтаълим мактабларида ўқишлар бошланишини, масъуллар синфхонани иситиб, дарсга тайёр бўлиши кераклигини айтган. Бу ҳақда «Дарё» ўқувчилари хабар берди.

Жумладан, Жиззах шаҳар халқ таълими бўлими мудири Ойдин Ҳамроқулованинг мактаб директорларига ёзган хабарида шундай дейилади. «Бугун ҳамма иссиқлик тармоғи сувини тўлдириб, ёқинглар. Қишки таътил бекор қилинди. Ҳаммага 11 январдан иш бошланади. Ўқитувчилар ўқувчиларни чақириб, дарсга тайёргарлик кўриб келишсин».

«Дарё» сўровига жавоб берган Ойдин Ҳамроқулова бу хабар мактаб директорларига 9 январь куни кечки пайт ёзилганини, 10 январь куни об-ҳаво кескин совигани ва қалин қор ёққани сабабли, бу топшириқ бекор бўлганини айтди.

«Ҳақиқатан ҳам 9 январь куни кечки пайт вилоят халқ таълими бошқармаси бошлиғи топшириғига кўра, мактаб директорларига шундай топшириқ бергандим. Боиси, бизда 9 январь куни об-ҳаво анча илиқ эди. Қолаверса, мактабларимиз иссиқ. Шу сабаб шундай қарорга келинганди. Бироқ бугун эрталаб соат 09:00 да Zoom орқали йиғилиш ўтказилиб, бу топшириқ бекор қилингани айтилган. Бизда ҳам таътил давом этадиган бўлди», — дейди Ойдин Ҳамроқулова.

«Дарё»га Сурхондарё вилояти халқ таълими бошқармаси бошлиғи Ўткир Қурбонов томонидан мактаб директорларига ёзилган топшириқ скриншоти ҳам келиб тушди. Унда масъул мактаб директорларига «Барча мактаблар бугун иситиш системасини сувга тўлдириб, печларни ёқсин. Эртадан ўқишни бошлаймиз», — дейди.

Сурхондарё вилояти ҳокимлиги ахборот хизматининг «Дарё» сўровига жавоб беришича, ҳудуддаги мактабларда дарс бошланиши билан боғлиқ хабарлар тўғри.

«Ҳудуддаги об-ҳаво бошқа жойларга нисбатан илиқ ва мактабларда иситиш тизимлари муаммоларсиз ишлаб тургани инобатга олиниб, мактаб директорларига шундай топшириқлар берилган», — дейди ҳокимлик ахборот хизмати раҳбари Муродбек Давлатов.

Telegram мессенжеридаги каналларда ҳам Ўзбекистондаги мактабларда 11 январдан бошлаб, дарс бошланиши ҳақида хабарлар тарқалмоқда. Бироқ айни пайтгача собиқ Халқ таълими вазирлиги  айни кундаги Мактабгача ва мактаб таълими вазирлиги мазкур хабарларни на рад этди ва на тасдиқлади. Вазирлик ахборот хизмати «Дарё» сўровига ҳам тез орада расмий жавоб берилишини билдирди.

«Дарё» воқеалар ривожини кузатишда давом этади.