“Real” o‘z tarixida ilk bor La Liga o‘yini boshlang‘ich tarkibiga ispaniyalik futbolchini kiritmadi

“Real” Ispaniya chempionati 16-turida “Vilyarreal”ga 1:2 hisobida mag‘lub bo‘ldi.

Karlo Anchelotti mazkur uchrashuv asosiy tarkibiga birorta ham ispaniyalik futbolchini qo‘ymadi. Bunaqasi klubning 120 yillik tarixida ilk bor kuzatildi. Shu vaqtga qadar La Liga o‘yinlaridagi “Real” boshlang‘ich tarkibida hech bo‘lmasa bir nafar ispan futbolchisi maydonga tushib kelayotgandi.

“Real”ning “Vilyarreal”ga qarshi o‘yindagi asosiy tarkibi quyidagi futbolchilardan iborat bo‘lgandi:

Tibo Kurtua (Belgiya), Eduar Mendi (Fransiya), Antonio Ryudiger (Germaniya), Eder Militao (Braziliya), David Alaba (Avstriya), Orelyen Tchuameni (Fransiya), Toni Kroos (Germaniya), Luka Modrich (Xorvatiya), Federiko Valverde (Urugvay), Vinisius Junior (Braziliya), Karim Benzema (Fransiya).

“Real”ning mazkur o‘yin uchun qaydnomasidan Luis Lopes, Xesus Valyexo, Lukas Vaskes, Dani Sebalyos va Marko Asensio kabi ispaniyalik futbolchilar joy olgandi.