«Реал» ўз тарихида илк бор Ла Лига ўйини бошланғич таркибига испаниялик футболчини киритмади

«Реал» Испания чемпионати 16-турида «Вильярреал»га 1:2 ҳисобида мағлуб бўлди.

Карло Анчелотти мазкур учрашув асосий таркибига бирорта ҳам испаниялик футболчини қўймади. Бунақаси клубнинг 120 йиллик тарихида илк бор кузатилди. Шу вақтга қадар Ла Лига ўйинларидаги «Реал» бошланғич таркибида ҳеч бўлмаса бир нафар испан футболчиси майдонга тушиб келаётганди.

«Реал»нинг «Вильярреал»га қарши ўйиндаги асосий таркиби қуйидаги футболчилардан иборат бўлганди:

Тибо Куртуа (Бельгия), Эдуар Менди (Франция), Антонио Рюдигер (Германия), Эдер Милитао (Бразилия), Давид Алаба (Австрия), Орельен Тчуамени (Франция), Тони Кроос (Германия), Лука Модрич (Хорватия), Федерико Вальверде (Уругвай), Винисиус Жуниор (Бразилия), Карим Бензема (Франция).

«Реал»нинг мазкур ўйин учун қайдномасидан Луис Лопес, Хесус Вальехо, Лукас Васкес, Дани Себальос ва Марко Асенсио каби испаниялик футболчилар жой олганди.