Namangan viloyati hokimi Shavkat Abdurazzoqov xorijda ishlayotgan mehnat migrantlari bilan onlayn muloqot o‘tkazdi. Bu haqda “Daryo” muxbiri Azizbek Abduvaliyev xabar bermoqda.
Muloqotda qayd etilishicha, bugungi kunda xorijda 85 ming nafarga yaqin namanganlik mehnat qilmoqda. 2022-yil yakuni bilan viloyatga xorijdan qariyb 1 milliard dollar yuborilgan bo‘lib, pul o‘tkazmalarining asosiy qismi Rossiya, Qozog‘iston, Janubiy Koreya va Turkiya hissasiga to‘g‘ri kelmoqda.
“Xorij safarlari davomida migrantlarimiz bilan ko‘rishib, ular ishlayotgan korxonalarga borishga, sharoitlarini o‘rganishga harakat qilyapmiz. Xususan, Moskva va Samaraga borganimizda shunday imkoniyat tug‘ildi. Endi onlayn shaklda ham har oyda muloqot qilib turamiz”, — dedi viloyat hokimi.
Tadbir davomida Tashqi mehnat migratsiyasi agentligining Moskva, Sankt-Peterburg, Samara, Novosibirsk, Yekaterinburg va Amurskdagi vakolatxonalari rahbarlari hamda shu hududlarda mehnat qilayotgan namanganlik migrantlar aloqaga chiqdi. Ularning subsidiya olish, viloyatga qaytib, dehqonchilik qilishlari uchun ekin maydonlari ajratish, xonadonlariga ko‘mir va gaz ballonlari yetkazish kabi murojaatlari tinglandi hamda yechim topildi.
Viloyat hokimi xorijda ishlayotgan namanganliklarning murojaatlari bilan tizimli ishlash uchun onlayn platforma yaratish taklifini berdi.
Muloqotda mehnat migrantlarining oila a’zolari ham ishtirok etdi. Ularga gaz plitasi, tikuv mashinasi va bir martalik yordam pullari topshirildi.
Mavzuga doir: Namangan hokimi Moskva viloyatida o‘zbekistonlik mehnat migrantlari bilan uchrashdi
Izoh (0)