Jizzax viloyatining Paxtakor tumanida noqonuniy ovchilar ekologiya inspektoriga tan jarohati yetkazdi. Bu haqda Jizzax viloyati ekologiya va atrof-muhitni muhofaza qilish boshqarmasi xabar berdi.
Ma’lum qilinishicha, 2-yanvar kuni Jizzax viloyati Paxtakor tumani ekologiya bo‘limi davlat inspektorlariga tumandagi Akmal Ikromov SIU hududida joylashgan fermer xo‘jaligi rahbari tomonidan hududda noqonuniy ov qilish holatlari kuzatilayotgani va ushbu ovchilarga nisbatan qonuniy chora ko‘rish haqida murojaat qilingan.
Murojaatni o‘rganish maqsadida ikki nafar tuman ekologiya inspektorlari ushbu fermer xo‘jaligi hududiga 2-yanvar kuni taxminan 15:30 lar atrofida yetib borganda hududda oq rangli Nexia-1 da uch kishi ov qurollari bilan ov qilib yurgani aniqlangan.
Shundan so‘ng inspektorlar ovchilardan tegishli hujjatlar so‘raganda, ular davlat inspektorlariga qarshilik ko‘rsatib, hujjatlarni taqdim etmasdan mashinani haydab ketishni boshlagan. Inspektorlardan biri mashina orqa eshigini ochib, ularni to‘xtatishga uringan. Lekin inspektorning qonuniy talabiga bo‘ysunmagan ovchilar inspektorni mashina saloniga tortib olib, Zafarobod tumaniga tomon haydab ketgan.
Ikkinchi inspektor X.Suvonqulov avtoulov orqasidan kuzatib boradi va mashinaga chiqib olgan inspektor Zafarobod tumani markaziga tan jarohati yetkazilgan holda avtoulovdan tushirib qoldirilgani guvohi bo‘ladi.
Mazkur holat yuzasidan noqonuniy ovchilarning shaxsini aniqlash va ularga nisbatan qonuniy chora ko‘rish uchun viloyat IIBga xabar berilib, jarohatlangan inspektor RSHTTYoM Jizzax viloyati filialiga tibbiy yordam ko‘rsatish uchun olib kelindi.
Qayd etilishicha, ayni kunda holat yuzasidan viloyat IIB tomonidan surishtiruv ishlari olib borilmoqda.
Izoh (0)