Дунёда нефть нархи тушиб бормоқда

4 январда глобал ёқилғига талаб билан боғлиқ хавотирлар фонида нефть нархининг пасайиши тезлашди. Бу ҳақда «Интерфакс» хабар бермоқда.

Лондоннинг ICE Futures биржасида Brent маркасининг март фьючерслари Тошкент вақти билан 15:42 га келиб 1,91 долларга (2,33 фоизга) пасайиб, бир баррель учун 80,19 долларни ташкил қилди. 19:13 да эса бир баррель учун 78,61 долларгача (4,25 фоизга) арзонлашди.

Нью-Йорк товар биржасидаги электрон савдоларда WTI нефтининг февраль фьючерсларининг котировкалари белгиланган вақтга келиб 1,76 долларга (2,29 фоиз) пасайиб, бир баррель учун 75,17 долларни ташкил қилди.

Бир кун олдин, 3 январда эса Brent нархи 4,4 фоизга, WTI 4,2 фоизга тушганди.

Инвесторлар АҚШдаги рецессия прогнозлари ва карантин чекловларининг асосий қисми олиб ташланганидан кейин ҳам касалланиш даражаси юқорилигича қолаётган Хитойда коронавирус билан боғлиқ вазиятдан хавотирда.

«Дунёдаги энг йирик импортёрда иқтисодий фаоллик ва нефтга бўлган талаб пасайишда давом этиши мумкин, чунки мамлакат COVID-19 билан яшашни ўрганмоқда», — дейди PVM Оil Associates таҳлилчиси Стивен Бреннок.

Унга кўра, иқтисодий қийинчиликларни фақат Хитой бошдан кечираётгани йўқ.

Таъкидланишича, АҚШ ва Европада қарор топган илиқ об-ҳаво қишда жаҳон бозорида ёқилғи тақчиллиги ҳақидаги қўрқувни сусайтиради.