Жанубий Корея президенти Юн Сок Ёл Chosun Ilbo газетасига берган интервьюсида Сеул ва Вашингтон Америка ядровий қуроллари иштирокида қўшма машғулотлар ўтказиш имкониятини муҳокама қилаётганини айтди.
«Ядро қуроллари АҚШга тегишли бўлса-да, разведка маълумотларини алмашиш, режалаштириш ва машғулотлар биргаликда амалга оширилиши керак»,— деди у ва АҚШнинг бу ташаббусга ижобий муносабатда эканини таъкидлади. Машғулотлар Жанубий Кореяга Шимолий Кореядан келадиган ядровий таҳдидга тайёрланишда ёрдам бериши кутилмоқда.
Юн Сок Ёлнинг айтишича, Пхеньян ядро қуролини яратгунига қадар, «ядровий соябон» Хитой ва СССРнинг эҳтимолий ҳаракатларидан ҳимояланиш учун мўлжалланганди. «АҚШ хавфсизлик учун қўлидан келганини қилишга ваъда бермоқда, шунинг учун Жанубий Корея хавотирланмаса ҳам бўлади», — деди президент. Бироқ унинг фикрича, ҳозир бу етарли эмас, «биргина бу билан одамларни хавфсизликка ишонтириш қийин».
31 декабрь куни КХДР Меҳнат партияси ялпи мажлисида Ким Чен Ин мамлакат ядровий арсеналини кучайтириш зарурияти ошганини, чунки Жанубий Корея «шак-шубҳасиз душман»га айланганини маълум қилди. Унинг баёнотига жавобан Жанубий Корея ядровий зарба амалга оширилган тақдирда, Ким Чен Ин режимига нуқта қўйилиши ҳақида огоҳлантирди.
Изоҳ (0)