АҚШ президенти Жо Байден ушбу лавозимга қайта сайланиш учун номзодини қўйиш-қўймаслиги ҳақида ҳали бир қарорга келмаган, деб ёзади Politico хабардор манбалар билан шахсий суҳбатларга таяниб.
Аввал ОАВ Байден бу ҳақда Санта-Крус оролида ўтказадиган таътили чоғида оиласи, бир нечта яқин дўстлари ва иттифоқчилари билан маслаҳатлашган ҳолда қарор қилиши мумкинлигини хабар қилганди.
Давлат раҳбарига яқин манбаларнинг айтишича, унинг сайловларда яна иштирок этиши эҳтимоли «юқори ва янада ортиб бормоқда». Манбаларга кўра, Байден якуний қарорини февраль ўрталарида эълон қилади.
Байденнинг баъзи яқинлари 80 ёшли президент учун кампания оқибатларидан хавотирда бўлса-да, президентнинг рафиқаси Жилл Байден номзодлик қарорини қўллаб-қувватламоқда, деб таъкидлади нашр манбалари.
Апрель ойида The Hill нашри Байден 2024 йилги сайловларда иштирок этиш нияти борлигини «ҳаммага тушунтираётгани» ҳақида хабар берганди. Нашр манбасига кўра, у бу ҳақда собиқ президент Барак Обама билан муҳокама қилган. Кейинчалик Оқ уй бундай режаларни тасдиқлади. Июнь ойида The New York Times баъзи демократлар Байденнинг рейтинги сабаб унинг ғалаба қозонишига ишончи комил эмаслигини ёзганди. Шу билан бирга, кўплаб Демократик партия тарафдорлари «бошқа исталган демократ Байдендан яхшироқ ишлайди» деган фикрларни рад этган.
Изоҳ (0)