Юнусобод туман тиббиёт бирлашмаси раҳбари Шоира Абдусатторова «Дарё» мухбири билан суҳбатда поликлиникаларда бажарилаётган ишлар ва бепул тарқатилаётган дорилар ҳақида маълумот берди.
Бепул берилаётган 120 хил дори
Президент қарори ва Соғлиқни сақлаш вазирлиги буйруғи билан 2022 йил февралдан бошлаб 120 хил дори аҳолига бепул тарқатилмоқда. Бунинг учун барча оилавий поликлиникаларда етарли дори-дармонлар захираси мавжуд.
Масалан, поликлиникамизнинг биринчи қавати дорихона ҳисобланади. Ҳар бир оилавий шифокор, тор соҳа мутахассиси рецепт асосида 120 хил дори-дармонни ёзиш ва бемор учун ушбу дорихонадан бепул олиш имкониятига эга. Оилавий поликлиникага мурожаат қилган барча шахсларга касаллиги юзасидан мавжуд барча дорилар билан бепул таъминланади.
Бугунги кундаги дори-дармон захирамиз юз минг нафардан ортиқ бемор учун 2024 йил июнь ойигача етади. Яъни ҳозир Юнусобод туманида 364 минг нафар аҳоли истиқомат қилади. Шундан 30 фоизи сурункали касалликлар билан оғриган тақдирда уларни бир ярим йил давомида бемалол доимий дори-дармон билан бепул таъминлай оламиз.
«Гемодиализга муҳтожларга ҳам дорилар бор»
Туманимизда тўққизта оилавий поликлиника ва битта марказий кўптармоқли оилавий поликлиника мавжуд бўлиб, уларда кунлик берилаётган дори-дармонларнинг электрон базаси ҳам юритилади.
Бугунги кунда поликлиникага бирор она боласи билан шамоллаш ҳолати юзасидан келса, уларни асоратсиз даволаш учун барча имкониятимиз бор. Сабаби вирус, йўтал, иситмага қарши дориларимиз етарли. Шунингдек, сурункали касалликка чалинган, кардиологик эндокринологик скринингларда аниқланган касаллиги бор беморларни ҳам доимий назорат остида даволаш учун барча дори-дармонлар мавжуд.
Гемодиализга муҳтож беморлар учун ҳам дори воситалари захираси мавжуд. Яъни гемодиализ олувчи беморларни бепул дорилар билан бемалол таъминлай оламиз.
«Шаҳар шифохоналарига бўлган юклама камаймоқда»
Айтиш мумкинки, бир кунда энг кичик поликлиникамизда ўртача 200 нафарга яқин беморларга дори бериш имкониятига эгамиз. Ҳозирда барча оилавий поликлиникаларимизда тиббий бригадалар ташкил этилган. Унда битта оилавий шифокор, иккита патронаж ҳамшираси ва амалиётчи ҳамшира фаолият юритмоқда.
Патронаж ҳамшираси сурункали ётоқли ёки поликлиникага чиқиш имкониятига эга бўлмаган беморларга уй шароитида, патронаж вақтида дори-дармонни бепул олиб бориб бериш имкониятига эга. Бунинг учун ҳам етарли дори-дармон захиралари бор.
Шифохонамиз икки сменада соат 8:00 дан 20: 00 гача фаолият юритмоқда. Барча зарурий дори воситалари таъминланган ҳолда беморларни амбулатор шароитида даволаш имкониятига эга бўлганимиз натижасида шаҳар шифохоналарига бўлган юкламани 10-15 фоизга камайтиряпмиз.
Изоҳ (1)
Ассалому алайкум. Нима киламиз бир бирмизни алдаб. Полиникада борсангиз врач дори ёзиб беради. Хеч кимга уша айтилган доридан берганини курмадим. Худога шукур тез ёрдамларда хаммаси яхши. Иш килиб куз тегиб узгариб колмасин.