Самарқанд ва Намаган шаҳарларига республикага бўйсинувчи шаҳар мақомини бериш таклифи президент томонидан Олий Мажлис ва халқга қилинган мурожаатда берилишини қуйидаги омиллар билан асослаш мумкин:
биринчидан, номи юқорида айтилган шаҳарларнинг тарихий аҳамиятининг муҳимлигидир. Айниқса, Самарқанд шаҳри мамлакатимиз тарихида иккита йирик империя пойтахти бўлгани (Қорохонийлар ва Амир Темур давлати) унинг тарихий аҳамиятини янада ошириб, ҳозирги кунда ҳам унинг нуфузини оширишга хизмат қилади. Самарқанд шаҳрини биз бемалол Ўзбекистоннинг тарихий пойтахти деб атай оламиз. Наманган шаҳри ҳам тарихда миллий давлатчилигимизнинг муҳим сиёсий ва маданий марказларидан бўлиб келган;
иккинчидан, Самарқанд ва Наманган шаҳарларини мақомини ўзгартириш орқали яқин истиқболда ушбу шаҳарларни мамлакатимизнинг йирик иқтисодий марказларига айлантириш имкониятига эга бўламиз. Ҳозирги изчил иқтисодий ислоҳотлар даврида ҳудудларни бир хилда ривожлантириш долзарб аҳамиятга эга. Бу эса яратилаётган моддий қийматларни ҳудудлар ўртасида тенг мувозанатини таъминлашга олиб келади;
учинчидан, Самарқанд ва Наманган шаҳарлари мамлакатимизда муҳим сосиал ва демографик аҳамиятга эга марказий шаҳарлардир. Аҳоли сони бўйича Тошкент шаҳридан кейин турадиган ушбу шаҳарларда ижтимоий ва маиший масалаларга алоҳида ёндашиш талаб этилади. Бандлик, таълим, соғлиқни сақлаш, коммунал хўжалик, хизмат кўрсатиш тизимини янги босқичга олиб чиқиш бугунги куннинг долзарб масаласидир;
тўртинчидан, маданий жиҳатдан бу шаҳарлар ўзининг ҳунармандчилик, туризм, миллий қадриятларимизни минг йиллар давомида ардоқлаб келаётган марказлар сифатида ўзига хос аҳамият касб этади. Қолаверса ўзбек халқининг ўтмишдан ўтроқ халқ бўлганлигидан далолат бериб турувчи рамз сифатида ҳам қараш мумкин.
Тараққий этган мамлакатларнинг тажрибаси шуни кўрсатмоқдаки, йирик шаҳарлар ташкил этмасдан ва маданий ва иқтисодий локомотив шаҳарларсиз иқтисодий ривожланиш ва аҳоли фаровонлигига эришиб бўлмайди. Шундай экан, бир миллион аҳолиги эга бўлган шаҳарларга алоҳида маъмурий ҳудудий бирлик сифатида мақом бериш тарихий заруриятдир.
Изоҳ (0)