Қозоғистон Ташқи ишлар вазирлиги мамлакат Россиянинг Қримдаги ҳаракатларини қораловчи БМТ резолюциясига нима сабабдан қарши овоз берганини маълум қилди. Бу ҳақда «Орда.кз» хабар берди.
ТИВ расмий вакили Айбек Смадияров 28 декабрь куни бўлиб ўтган брифингда мамлакат Украинадаги вазиятни тинч йўл билан ҳал этиш тарафдори эканини айтди. Қозоғистон Украина суверенитети ва ҳудудий яхлитлигини ҳурмат қилиши ва тан олишини таъкидлади.
«Қозоғистоннинг позицияси изчил ва ўзгармасдир. 2016 йилдан бери биз ушбу резолюцияга бир хил овоз беришда давом этмоқдамиз», — деди Смадияров.
Сиёсатчи бу масалани БМТ Инсон ҳуқуқлари кенгаши кўриб чиқиши кераклигини таъкидлади. У кўп фуқаролар Қозоғистоннинг овоз бериш бўйича позициясини нотўғри тушуниб, жанжал кўтаргани, бунда оммавий ахборот воситалари «афсуски, уларни қўллаб-қувватлаганини» билдирди.
«Бизнинг принципиал позициямиз шу: Қрим ва Севастопол шаҳридаги инсон ҳуқуқлари билан боғлиқ вазият БМТнинг махсус органи, яъни БМТ Инсон ҳуқуқлари кенгашида кўриб чиқилиши керак. Шу билан бирга, БМТ Бош ассамблеясининг Инсон ҳуқуқлари бўйича кенгаши тўғрисидаги 60/251-сонли резолюциясига кўра, Инсон ҳуқуқлари бўйича кенгаш ҳақида асосий маълумотлар холислик тамойилларига амал қилиши ва сиёсийлаштирилишига йўл қўймаслик керак. Ҳозирда Қозоғистон 46 та давлат қатори БМТ Инсон ҳуқуқлари бўйича комиссиясига аъзо», — деди вазирлик расмийси.
БМТ Бош ассамблеяси Қрим бўйича янгиланган резолюцияни қабул қилди
БМТ Бош ассамблеяси 15 декабрь куни аннексия қилинган Қримда инсон ҳуқуқлари бузилишига оид янгиланган резолюцияни қабул қилди. 82 давлат «Вақтинча босиб олинган Қрим ва Украинанинг Севастополидаги инсон ҳуқуқлари билан боғлиқ вазият» ҳужжатини қўллаб-қувватлаш учун овоз берди. 80 та давлат бетараф қолди.
Ўн тўртта давлат: Беларусь, Хитой, Куба, Шимолий Корея, Эритрея, Эфиопия, Эрон, Қозоғистон, Мали, Никарагуа, Россия, Судан, Сурия ва Зимбабве қарши овоз берди. Ўзбекистон овоз бериш жараёнида иштирок этмаган.
Ўтган йилларда босиб олинган ярим оролдаги инсон ҳуқуқлари билан боғлиқ вазият бўйича қабул қилинган шунга ўхшаш резолюцияларда келтирилган қоидаларга қўшимча равишда, ушбу ҳужжат Россиянинг Қримдан Украинага тажовуз қилиш мақсадида фойдаланиш ҳаракатларини ҳамда Херсон ва Запорожье вилоятларини ноқонуний аннексия қилишга уринишларни қоралайди.
Изоҳ (0)