O‘zbekistonda hokimlarga nisbatan ishonchsizlik votumi taqdim etish tartibi joriy etilishi kutilmoqda. Bu haqda Adliya vazirligi tomonidan ishlab chiqilgan qonun loyihasida ko‘zda tutilgan.
Jamoatchilik muhokamasi uchun e’lon qilingan qonun loyihasiga ko‘ra, Mahalliy ijroiya hokimiyati to‘g‘risidagi qonun birinchi bobiga Mahalliy ijroiya hokimiyatining rahbariga nisbatan ishonchsizlik votumi deb nomlangan 7-modda kiritilmoqda.
Ushbu moddada Xalq deputatlari kengashlarining deputatlari umumiy sonining kamida beshdan bir qismi hokimga nisbatan ishonchsizlik votumi bildirish taklifi bilan chiqish huquqiga egaligi belgilangan.
Hokimga nisbatan ishonchsizlik votumini qabul qilish uchun quyidagilar asos bo‘ladi:
- xalq deputatlari kengashlari tomonidan tasdiqlangan hududni rivojlantirish bo‘yicha dasturda nazarda tutilgan tadbirlarning kamida uchdan bir qismi bajarilmagan yoki lozim darajada bajarilmaganligi;
- hokim tomonidan xalq deputatlari kengashlari vakolati doirasida berilgan qonuniy talablar ikki martadan ortiq bajarilmaganligi;
- hokim tomonidan davlat fuqarolik xizmatchilarining odob-axloq qoidalarini buzilganligi;
- hokim yoki uning o‘rinbosarlari tomonidan davlat xaridlarini amalga oshirishda manfaatlar to‘qnashuviga yo‘l qo‘yganligi, shuningdek mahalliy byudjet mablag‘larini sarflashda qonunchilik talablari buzilganligi.
Qabul qilingan ishonchsizlik votumi xalq deputatlari Kengashining raisi tomonidan besh kunlik muddat ichida hokimni lavozimidan ozod uchun tegishlicha prezidentga yoki yuqori turuvchi hokimga yuboriladi.
Hokimga nisbatan ishonchsizlik votumi qabul qilingan holatda prezident yoki yuqori turuvchi hokim 10 kunlik muddat ichida hokimni lavozimidan ozod etish yoki ishonchsizlik votumini rad etish masalasini ko‘rib chiqadi.
Hokimni lavozimidan ozod etish to‘g‘risida qaror qabul qilingan taqdirda, uning o‘rinbosarlari ham iste’foga chiqariladi.
Ishonchsizlik votumi rad etilganda, tegishli xalq deputatlari kengashi 6 oydan so‘ng hokimga nisbatan takroran ishonchsizlik votumini qabul qilib, yana prezident yoki yuqori turuvchi hokimga yuborishi mumkin.
Qonun loyihasi muhokamasi 11-yanvargacha davom etadi.
Izoh (0)