Ўзбекистонда ҳокимларга нисбатан ишончсизлик вотуми тақдим этиш тартиби жорий этилиши кутилмоқда. Бу ҳақда Адлия вазирлиги томонидан ишлаб чиқилган қонун лойиҳасида кўзда тутилган.
Жамоатчилик муҳокамаси учун эълон қилинган қонун лойиҳасига кўра, Маҳаллий ижроия ҳокимияти тўғрисидаги қонун биринчи бобига Маҳаллий ижроия ҳокимиятининг раҳбарига нисбатан ишончсизлик вотуми деб номланган 7-модда киритилмоқда.
Ушбу моддада Халқ депутатлари кенгашларининг депутатлари умумий сонининг камида бешдан бир қисми ҳокимга нисбатан ишончсизлик вотуми билдириш таклифи билан чиқиш ҳуқуқига эгалиги белгиланган.
Ҳокимга нисбатан ишончсизлик вотумини қабул қилиш учун қуйидагилар асос бўлади:
- халқ депутатлари кенгашлари томонидан тасдиқланган ҳудудни ривожлантириш бўйича дастурда назарда тутилган тадбирларнинг камида учдан бир қисми бажарилмаган ёки лозим даражада бажарилмаганлиги;
- ҳоким томонидан халқ депутатлари кенгашлари ваколати доирасида берилган қонуний талаблар икки мартадан ортиқ бажарилмаганлиги;
- ҳоким томонидан давлат фуқаролик хизматчиларининг одоб-ахлоқ қоидаларини бузилганлиги;
- ҳоким ёки унинг ўринбосарлари томонидан давлат харидларини амалга оширишда манфаатлар тўқнашувига йўл қўйганлиги, шунингдек маҳаллий бюджет маблағларини сарфлашда қонунчилик талаблари бузилганлиги.
Қабул қилинган ишончсизлик вотуми халқ депутатлари Кенгашининг раиси томонидан беш кунлик муддат ичида ҳокимни лавозимидан озод учун тегишлича президентга ёки юқори турувчи ҳокимга юборилади.
Ҳокимга нисбатан ишончсизлик вотуми қабул қилинган ҳолатда президент ёки юқори турувчи ҳоким 10 кунлик муддат ичида ҳокимни лавозимидан озод этиш ёки ишончсизлик вотумини рад этиш масаласини кўриб чиқади.
Ҳокимни лавозимидан озод этиш тўғрисида қарор қабул қилинган тақдирда, унинг ўринбосарлари ҳам истеъфога чиқарилади.
Ишончсизлик вотуми рад этилганда, тегишли халқ депутатлари кенгаши 6 ойдан сўнг ҳокимга нисбатан такроран ишончсизлик вотумини қабул қилиб, яна президент ёки юқори турувчи ҳокимга юбориши мумкин.
Қонун лойиҳаси муҳокамаси 11 январгача давом этади.
Изоҳ (0)