Zidandan Benitesgacha. Braziliya terma jamoasi bosh murabbiyiga aylanishi mumkin bo‘lganlar ro‘yxati ma’lum bo‘ldi

Braziliya terma jamoasi Titening iste’fosidan keyin bosh murabbiylik uchun qator nomzodlarni ko‘rib chiqyapti.

L’Equipe nashrining xabar qilishicha, ushbu lavozimga Zinedin Zidan, Maurisio Pochettino, Tomas Tuxel va Rafael Benites kabi mutaxassislar nomzod bo‘lib turibdi.

Qayd etilishicha, Braziliya futbol konfederatsiyasi ushbu o‘ringa sezilarli natijalarga erishgan chet ellik murabbiyni tayinlamoqchi. Ayni vaqtda ishsiz yurgan mutaxassislar eng maqbul variant sifatida ko‘rilmoqda.

Avvalroq Braziliya terma jamoasiga “Real” ustozi Karlo Anchelottining nomzodi ko‘rib chiqilayotgani xabar qilingandi.

Braziliyaning avvalgi ustozi Tite JCH—2022 dan keyin iste’fo bergan. “Pentakampeonlar” Qatar mundiali chorak finalida Xorvatiyaga yengilib, musobaqa bilan xayrlashgandi.