Avstriyadagi tog‘-chang‘i kurortida 10 kishi qor ko‘chkisida qoldi

Avstriya g‘arbidagi Lex Syurs tog‘-chang‘i kurortida o‘nga yaqin odam qor ko‘chkisi ostida qoldi, deb xabar bermoqda Kronen Zeitung.

Halok bo‘lganlar va yaralanganlarning aniq soni noma’lum, deya ta’kidlaydi gazeta. Bir nafar yarador qutqarilgani haqida xabar berilgan.

Qutqaruv operatsiyasiga 100 kishi, shuningdek, bir nechta vertolyotlar jalb qilingan. Keyinroq Kronen Zeitung nashrining aniqlik kiritishicha, sakkiz kishi qutqarilgan. Ulardan ikki nafari jabrlangan, yana olti nafari qor ko‘chkisi ostiga tushmagani va jarohatlar olmagani aniqlandi. Qolgan ikki chang‘ichining taqdiri noma’lum.

Mamlakat g‘arbida joylashgan yana bir tog‘-chang‘i kurorti – Zyoldenga ham ko‘chki yog‘ildi. Kronen Zeitung yozishicha, dastlab hodisa vaqtida bir kishi jarohatlangan bo‘lishi mumkinligi taxmin qilingan, ammo qutqaruv operatsiyasi davomida hech kim topilmagan, qidiruv to‘xtatilgan.

Avval Avstriyaning Shpiss shahri yaqinida qor ko‘chishi oqibatida besh kishi halok bo‘lgandi.