Японияда нархлар ошиши 1991 йилдан бери рекорд даражага етди

Японияда ноябрь ойида истеъмол нархлари ўтган йилнинг шу ойига нисбатан 3,8 фоизга ошди. Бу ҳақда «Интерфакс» хабар бермоқда. 

Мазкур кўрсаткич 1991 йил январь ойидан бери энг юқориси бўлиб, нархларнинг кўтарилиши кетма-кет 15 ой давомида қайд этилди. 

Ноябрда нархлар ошиши октябрь ойидаги 3,7 фоизлик инфляцияга нисбатан 0,1 фоизга тезлашди.

Япония банки томонидан назорат қилинадиган асосий кўрсаткич бўлган янги озиқ-овқат маҳсулотларидан ташқари истеъмол нархлари сентябрь ойида 3,6 фоизга ўсганидан кейин ўтган ойда 3,7 фоизга ошди. 

Ўсиш суръати 1981 йил декабридан бери энг юқори кўрсаткичдир. Шу билан бирга, бу кўрсаткич мамлакат марказий банкининг кетма-кет саккизинчи ойдаги 2 фоизлик мақсадли кўрсаткичидан ошиб кетди.

Японияда озиқ-овқат маҳсулотлари 6,9 фоизга, кийим-кечак 2,7 фоизга, ёқилғи, электр энергияси ва сув таъминоти 14,1 фоизга, жумладан, электр энергияси 20,1 фоизга ва газ 21 фоизга қимматлашган. Транспорт ва телекоммуникация хизматлари нархи 1,6 фоизга, таълим — 0,7 фоизга ошган.

Аввалроқ Ўзбекистонда ноябрь ойида 1,3 фоизлик инфляция қайд этилгани ҳақида хабар берилган эди.