Har bir inson shunga o‘xshash vaziyatga duch keladi: sovuq boshlandi va kurtkalarni mashinada yuvish yoki kimyoviy tozalashga berishga mutlaqo vaqt yo‘q. Yaxshi xabar shundaki, ushbu holatda kurtkalarni yangidek ko‘rinishiga yordam beradigan bir nechta usullar mavjud. The Voice Mag nashri bu borada bir nechta tavsiyalar berib o‘tdi.
Agar kurtkaga loy yoki kir suv tekkan bo‘lsa, oz miqdordagi shampunni suvda suyultirib, gubkaning yumshoq tomoniga shimdiriladi. Dog‘lar yengil harakat bilan ishqalanadi. Bu bilan kurtkaning ichki qismi ho‘l bo‘lmaydi, faqat yuzasi tozalanadi.
Kurtkaning qalpoq, manjet, yoqalar va cho‘ntak qismi tezda kir bo‘lishi mumkin. Ushbu muammolar matoning teriga va boshqa sirtlarga tegishi tufayli yuzaga keladi. Bu holatda oshxona tuzi yog‘ni o‘ziga tortib olishi bilan yordam beradi. Uni faqat kerakli joylarga yoyib, bir necha daqiqa kutib turish va sirtni muloyimlik bilan artib olish lozim.
“Ko‘lmaklar davrida” oyoq kiyimdan sachraydigan suv dog‘lari kurtkaning tashqi ko‘rinishiga putur yetkazishi tabiiy. Suv va sirka eritmasi kir suv izlarini yo‘q qilishga yordam beradi. Doimgidek, aralashma bilan kurtkaning kerakli joylarini artib tashlash kerak va bir zumda qishki kiyim toza holatga keladi.
Xuddi shunday olma sirkasi va suv garderobdagi kiyimlarning yoqimsiz hididan xalos bo‘lishga yordam beradi. Eritma mato yordamida kiyimning astariga qo‘llanadi va u to‘liq quriguncha kutiladi. Agar sirka bo‘lmasa, oz miqdorda suv, bir necha tomchi oddiy spirt eritmasidan foydalanish mumkin.
Bir osh qoshiq kraxmal, limon sharbati va tuz aralashmasi qurigan dog‘ni tozalashning tasdiqlangan usuli hisoblanadi. Birinchi ikkita mahsulot erituvchi xususiyatga ega, kraxmal hamma narsani bir-biriga bog‘laydi. Dastlab kerakli joy quyuq aralashma bilan ishqalanadi, keyin nam mato bilan artib olinadi.
Izoh (0)