Ҳар бир инсон шунга ўхшаш вазиятга дуч келади: совуқ бошланди ва курткаларни машинада ювиш ёки кимёвий тозалашга беришга мутлақо вақт йўқ. Яхши хабар шундаки, ушбу ҳолатда курткаларни янгидек кўринишига ёрдам берадиган бир нечта усуллар мавжуд. The Voice Mag нашри бу борада бир нечта тавсиялар бериб ўтди.
Агар курткага лой ёки кир сув теккан бўлса, оз миқдордаги шампунни сувда суюлтириб, губканинг юмшоқ томонига шимдирилади. Доғлар енгил ҳаракат билан ишқаланади. Бу билан куртканинг ички қисми ҳўл бўлмайди, фақат юзаси тозаланади.
Куртканинг қалпоқ, манжет, ёқалар ва чўнтак қисми тезда кир бўлиши мумкин. Ушбу муаммолар матонинг терига ва бошқа сиртларга тегиши туфайли юзага келади. Бу ҳолатда ошхона тузи ёғни ўзига тортиб олиши билан ёрдам беради. Уни фақат керакли жойларга ёйиб, бир неча дақиқа кутиб туриш ва сиртни мулойимлик билан артиб олиш лозим.
«Кўлмаклар даврида» оёқ кийимдан сачрайдиган сув доғлари куртканинг ташқи кўринишига путур етказиши табиий. Сув ва сирка эритмаси кир сув изларини йўқ қилишга ёрдам беради. Доимгидек, аралашма билан куртканинг керакли жойларини артиб ташлаш керак ва бир зумда қишки кийим тоза ҳолатга келади.
Худди шундай олма сиркаси ва сув гардеробдаги кийимларнинг ёқимсиз ҳидидан халос бўлишга ёрдам беради. Эритма мато ёрдамида кийимнинг астарига қўлланади ва у тўлиқ қуригунча кутилади. Агар сирка бўлмаса, оз миқдорда сув, бир неча томчи оддий спирт эритмасидан фойдаланиш мумкин.
Бир ош қошиқ крахмал, лимон шарбати ва туз аралашмаси қуриган доғни тозалашнинг тасдиқланган усули ҳисобланади. Биринчи иккита маҳсулот эритувчи хусусиятга эга, крахмал ҳамма нарсани бир-бирига боғлайди. Дастлаб керакли жой қуюқ аралашма билан ишқаланади, кейин нам мато билан артиб олинади.
Изоҳ (0)