Rossiyaning kosmik tarmog‘ini boshqaruvchi “Roskosmos” davlat korporatsiyasi sobiq rahbari Dmitriy Rogozin Donetskda mehmonxona o‘qqa tutilishi oqibatida yaralandi. U kasalxonaga yotqizilgan, hayoti xavf ostida emas. Bu haqda “TASS” va “RIA Novosti” Rogozinning yordamchisiga tayanib xabar berdi.
“Donetsk tashqarisidagi mehmonxona o‘qqa tutilgan, u yerda so‘nggi kunlarda Dmitriy Rogozin boshchiligidagi harbiy maslahatchilar guruhi yashab kelayotgan edi. Dmitriy Olegovich belidan jarohat oldi. U kasalxonaga yotqizildi. Hayotiga nisbatan xavf yo‘q”, — dedi yordamchi. Uning so‘zlariga ko‘ra, Rogozinning yo‘ldoshlari ham yaralangan.
“Belimdan yaralandim. Lekin yashayman. O‘q bo‘lagi umurtqa pog‘onasidan bir santimetr nariroqdan kirgan”, — deya sobiq mansabdorning o‘zi olingan jarohatlarini izohladi.
O‘z navbatida, Baza xabar berishicha, Donetskda Rogozin tug‘ilgan kunini nishonlayotgan restoran o‘qqa tutilgan.
Ba’zi ma’lumotlarga ko‘ra, restoranga o‘q yog‘dirilishi oqibatida besh kishi yaralanib, kamida bir kishi — DXR hukumati raisi Vitaliy Xotsenkoning qo‘riqchisi halok bo‘lgan bo‘lishi mumkin. Xotsenkoning o‘zi, Baza yozishicha, yaralangan.
Dmitriy Rogozin to‘rt yillik faoliyatidan keyin, 2022-yil iyulida “Roskosmos” rahbari lavozimidan ozod etilgan edi. Uning o‘rnini bungacha Rossiya bosh vaziri o‘rinbosari vakolatlarini bajarib kelgan Yuriy Borisov egalladi.
“Roskosmos”dan ishdan ketganidan keyin Rogozin o‘z Telegram-kanalida urush haqida ko‘p yozadigan bo‘ldi. 2022-yil noyabrida u “Shoh bo‘rilari” nomi ostida harbiy maslahatchilar guruhini tuzib, unga rahbarlik qilayotganini ma’lum qildi, bu guruh DXR va LXR jangovar bo‘linmalariga harbiy-texnik ko‘mak berish bilan shug‘ullanadi.
Mavzuga doir:
- Rossiya Ukrainadagi harbiy harakatlarni kuzatib borish uchun mingta sun’iy yo‘ldoshni ishga tushiradi
- Yevropa kosmik agentligi Rossiya bilan Oyni tadqiq qilish dasturi doirasidagi hamkorlikni to‘xtatdi
- Yevropa kosmik agentligi Marsni tadqiq qilishda “Roskosmos” bilan hamkorlikdan bosh tortdi. Rossiya Marsga o‘zi missiya jo‘natmoqchi
Izoh (0)