Prezident tomonidan “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun imzolandi, deb xabar bermoqda Norma.
Hujjatga muvofiq, muayyan yashash joyiga ega bo‘lmagan shaxslarni reabilitatsiya markaziga joylashtirish bo‘yicha qaror qabul qilish vakolati ma’muriy sudlardan jinoyat ishlari bo‘yicha sudlarga o‘tkazildi.
Bunday o‘zgartirishni sababi sifatida ma’muriy sudlarning geografik joylashuvi noqulayligi sababli (viloyatlarda ma’muriy sudlar viloyat markazlarida joylashgan) ichki ishlar xodimlar tomonidan o‘z xizmat joylarini uzoq muddatga qoldirishga majburligi keltirilmoqda.
Ichki ishlar organlari materiallarni tayyorlab, shaxs aniqlangan yoki markaz joylashgan jinoyat ishlari bo‘yicha sudga muayyan yashash joyiga ega bo‘lmagan shaxsni 30 sutkagacha reabilitatsiya markaziga joylashtirish haqida iltimosnoma kiritadi.
Iltimosnoma kelib tushgandan boshlab 24 soat ichida yopiq sud majlisida ko‘rib chiqiladi.
Shaxsni reabilitatsiya markaziga joylashtirish yoki iltimosnomani rad etish haqidagi qaror e’lon qilingan paytdan kuchga kiradi va zudlik bilan ijro etilishi lozim.
Shaxsni reabilitatsiya markaziga joylashtirish haqidagi qarorga 3 kun ichida shaxs tomonidan, uning qonuniy vakili va advokati tomonidan apellyatsiya shikoyati, prokuror tomonidan protest keltirilishi mumkin.
Izoh (0)