Pirotexnika savdosi bilan shug‘ullanuvchilar buning oqibatida sodir bo‘ladigan gunohga ham sherikdir — Musulmonlar idorasi

O‘zbekiston musulmonlari idorasi fuqarolarni pirotexnika vositalaridan foydalanish va uning savdosi bilan shug‘ullanishdan qaytardi.

Idora matbuot xizmati har yili milodiy sana boshlanish arafasida ayrim kishilar tomonidan pirotexnika vositalari — paqildoqlarni yoqish oqibatida juda ko‘p odamlar oromi buzilib, xotirjamlik yo‘qolishi, turli ko‘ngilsiz voqealar, ta’bni xira qiladigan holatlar sodir bo‘lishini qayd etgan.

Qo‘qqisdan pirotexnika portlaganini eshitgan keksalar yoki bemor kishilarning ahvoli ancha og‘irlashgani, ayrim hollarda esa o‘lim bilan tugagani ko‘pchilikka ma’lumligi, shifokorlar uning ovozi to‘satdan cho‘chitgani bois yurak-qon tomir tizimiga salbiy ta’sir etishi haqida ogohlantirgani ham ta’kidlangan.

“Hadislarda hazrati payg‘ambarimiz s.a.v. musulmonni qo‘rqitish — musulmonga halol emas, deb ta’kidlaganlar. Boshqa hadisi sharifda esa Nabiy alayhissalom musulmon musulmonlar uning tilidan va qo‘lidan salomat bo‘lgan kishidir, deya marhamat qilganlar”, — deya bildirib o‘tgan Musulmonlar idorasi.

Pirotexnika vositalari oldi-sotdisidan tushayotgan pul ham halol emasligi, bunday buyumlarni sotib olish molni isrof qilish ekanligi ta’kidlab o‘tilgan: “Pirotexnika vositalari savdosi bilan shug‘ullanuvchilar buning oqibatida sodir bo‘ladigan gunohga ham sherikdir. Uning oldi-sotdisidan tushayotgan pul ham halol emas”.

O‘zbekiston qonunchiligida ham pirotexnika vositalari noqonuniy oldi-sotdisi uchun javobgarlik belgilangan.

Ma’muriy javobgarlik to‘g‘risidagi kodeksning 185-1-moddasiga muvofiq, pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalaniash, xuddi shuningdek, ularni O‘zbekistonga olib kirish yoki O‘zbekistondan olib chiqish yoki o‘tkazish huquqbuzarlik ashyolarini musodara qilib, BHMning 5 baravaridan 25 baravarigacha miqdorda jarima solishga sabab bo‘ladi.

Jinoyat kodeksining 250-1-moddasida esa bunday qilmishlar sodir etganlar uchun kim tomonidan sodir etilgani va qanday oqibatlarga olib kelganiga qarab turli jazo choralari, jumladan, 8 yildan 10 yilgacha ozodlikdan mahrum qilish jazosi qo‘llanishi ko‘zda tutilgan.

Mavzuga doir:

• “Alloh isrof qilguvchilarni yaxshi ko‘rmaydi. Hammasi uchun javob beramiz” — Muftiy Nuriddin Xoliqnazarov
• “Korrupsionerlarni la’natlaymiz, lekin ularni poraxo‘r qilayotgan biz o‘zimiz-ku” — Muftiy Nuriddin Xoliqnazarov