Xalqaro moliya korporatsiyasi Ukrainaga 2 milliard dollar ajratadi

Jahon banki tuzilmasi tarkibiga kiruvchi Xalqaro moliya korporatsiyasi (IFC) direktorlar kengashi Ukraina biznesini moliyalashtirish dasturi uchun 2 milliard dollar ajratadi. Bu haqda mamlakat Iqtisodiyot vazirligining matbuot xizmati xabar berdi.

Ushbu dasturni amalga oshirishning asosiy yo‘nalishlari Ukraina banklari, qishloq xo‘jaligi sektori, kichik va o‘rta biznes uchun savdoni moliyalashtirishdir.

Ta’kidlanishicha, korporatsiya rahbariyati IFC’ga davlat kompaniyalari bilan ishlashga ruxsat berish taklifini qo‘llab-quvvatlagani juda muhim.

“Bu Ukraina uchun istisno sifatida amalga oshirildi. Umuman olganda, IFC’ga davlat kompaniyalari bilan ishlash amalda taqiqlangan”, — dedi Bosh vazirning birinchi o‘rinbosari — Iqtisodiyot vaziri Yuliya Sviridenko.

Unga ko‘ra, bu hozir Ukrainaga sarmoya kiritish yoki qilmaslik haqida o‘ylayotgan ko‘plab investorlar uchun ijobiy belgidir.

Bunday moliyalashtirish xususiy kredit kapitalini safarbar etishi kutilmoqda, chunki IFC odatda tijorat banklari va boshqa XMIlarni moliyaviy konsorsiumga qo‘shish orqali loyiha qiymatining 30 foizdan ko‘p bo‘lmagan qismini moliyalashtiradi.

Shunday qilib, Ukraina korxonalarining moliyalashtirilishi mumkin bo‘lgan loyihalarining umumiy hajmi 6 milliard dollardan ortiqni tashkil qilishi mumkin.

Mavzuga doir: Yevropa Ittifoqi Ukrainaga 18 mlrd yevrolik yordam puli ajratadi