Россия армияси Украинадаги урушда логистика билан боғлиқ муаммоларга дуч келганидан ташқари, озиқ-овқат, харита, зарур тиббий буюмларга эга эмасди. Ҳарбийлар баъзи қуроллардан фойдаланиш бўйича кўрсатмаларни топиш учун Wikipedia’га мурожаат қилган. The New York Times рус ҳарбийлари урушга қандай жўнатилгани ҳақида мақола эълон қилди.
Нашрга Россия қуролли кучларининг 155-денгиз пиёдалари бригадаси аскарлари эски қуроллар, хусусан, 1970 йиллардаги Калашников автоматлари билан қуроллангани келтирилади. Кам тажрибали армияга ёлланганлар қуроллардан қандай қилиб тўғри фойдаланиш бўйича Интернетдан маълумот қидирган.
Аскарлар мамлакат бўйлаб ҳаракатланиш учун эски хариталарга таянган, баъзи хариталар 1960 йилларники бўлган, ҳарбийларнинг кўпи мобил телефонлар орқали Россиядаги рақамларга қўнғироқ қилган. Бу эса Украина кучларига уларнинг жойлашувини аниқлаш ва ҳужум қилиш имконини берган.
Дастлаб бўлинма командирлари ўз қўл остидагиларга жангни кўрмасликларини айтган. Аммо аскарлар ўз сафдошлари атрофида қандай қилиб ўлдирилаётганини кўрганида, уларга тўлиқ ҳақиқат айтилмаганини тушунган. Октябрь ойида Украинанинг Павловка шаҳри яқинида кўплаб сафдошларининг ўлимига гувоҳ бўлган Михаил исмли рус аскари журналистларга ўз взводидаги 60 нафар аскардан 40 нафари ҳалок бўлгани, фақат саккиз нафари оғир жароҳатлардан қутулиб қолганини айтган.
«Бу уруш эмас. Бу рус халқини ўз қўмондонлари томонидан йўқ қилиниши», — дейди у.
Нашр журналистлари Путин февраль ойи охирида Украинага бостириб кириши билан мамлакат армиясига юқори даражада ишонч билдирганини ёзади. Россия ҳарбий раҳбарлари Украинани тезда назоратига олишини кутган ва офицерларга Киевдаги ҳарбий парадлар учун либослар ва медаллар олиб келиш буюрилган. Бироқ, Кремль режаси амалга ошмаган.
Мавзуга доир:
Изоҳ (0)