Zelenskiy idorasi Ukrainadagi urush qanday tugashini prognoz qildi
Ukraina prezidenti devonining bosh maslahatchisi Mixail Podolyak urush qanday tugashini va Rossiya bilan muzokara olib borish shartini ma’lum qildi.
Uning so‘zlariga ko‘ra, muzokara uchun Rossiya Ukrainadan qo‘shinlarini olib chiqishi va elitasini o‘zgartirishi kerak.
“Rossiya o‘z qo‘shinlarini olib chiqib, Ukraina hududlarini ozod qilishi kerak. Rossiya elitasi transformatsiyadan o‘tishi zarur. Shundan so‘ng muzokaralar boshlanib, konstruktiv muloqot bo‘ladi. Unda Rossiyaning xalqaro huquqqa qaytishi, tovon to‘lovi miqdori va Yaltadagi maxsus tribunalga yig‘ilish jadvali kelishib olinadi”, — deydi Podolyak.
Shuningdek, rasmiy Ukrainadagi urush qanday tugashini ham prognoz qildi. “An’anaviy urush bo‘ladi, bu vaqt davomida Rossiya asta-sekin o‘zining hujum qobiliyatini zaiflashtiradi, ya’ni 1991-yildagi Rossiya chegaralariga asta-sekin chekinadi”, — deydi u.
Prezident devoni vakilining qo‘shimcha qilishicha, urush mudofaa kuchlari Ukraina chegaralariga yetib borishi bilan tugamaydi. Chunki bundan keyingi qadam chegara zonasini demilitarizatsiya qilish hisoblanadi.
“Rossiya harbiy xizmatchilari chegaradan 50-100 kilometr uzoqlikka chekinadi. Urush bilan bog‘liq voqealar bundan keyin ham shunday rivojlanadi”, — deya qo‘shimcha qildi Podolyak.
- “Ukrainadagi urushni Rossiya boshlamagan” — Putin (video)
- “Rossiya bahorda yangi hujum boshlash uchun Ukrainadagi urushni muzlatmoqchi” — Stoltenberg
- Ukrainadagi urush qishda qanday kechishi prognoz qilindi
