Xitoy hukumati Buyuk Britaniyadan olti nafar diplomatini, jumladan Manchesterdagi bosh konsul Chjen Siyuanni chaqirib oldi, deb yozmoqda Daily Mail.
Britaniya tashqi ishlar vaziri Jeyms Kleverlining so‘zlariga ko‘ra, bunday choraga 16-oktabr kuni Manchesterda gonkonglik faol bilan sodir bo‘lgan voqea sabab bo‘lgan. O‘sha kuni gonkonglik bir necha o‘nlab faollar Xitoy konsulxonasi oldida Xitoy Kommunistik partiyasi siyosatini tanqid qiluvchi va mamlakatda demokratik islohotlar o‘tkazishni talab qiluvchi plakatlar bilan to‘plangan.
Biroz o‘tgach, namoyishchilarni tarqatish uchun konsulxonadan dubulg‘a va himoya kamzulini kiygan bir necha erkak chiqqan. Namoyishchilardan biri majburan konsullik hududiga olib ketilgan va u yerda go‘yoki kaltaklangan. Britaniya ommaviy axborot vositalarining yozishicha, britaniyalik politsiyachi Xitoy diplomatik vakolatxonasiga kirib, mojaroni to‘xtatgan va u yerdan faolni olib ketgan.
“Katta Manchester politsiyasi tergov boshladi va uning bir qismi sifatida olti nafar xitoylik amaldorni so‘roq qilishi uchun ularni diplomatik daxlsizlikdan mahrum qilishni so‘radi”, — dedi Kleverli.
TIV rahbarining aytishicha, bu haqda Xitoy elchixonasi xabardor qilingan. Buyuk Britaniyaning so‘roviga javoban XXR hukumati ushbu amaldorlarni, shu jumladan bosh konsulni Buyuk Britaniyadan chaqirib olgan.
Avvalroq Buyuk Britaniya bosh vaziri Rishi Sunak Xitoy—Buyuk Britaniya munosabatlarining “oltin davri” tugaganini ma’lum qilgandi.
Izoh (0)