Хитой Манчестерда гонконглик фаолнинг калтакланишига алоқадор дипломатларини Британиядан чақириб олди

Хитой ҳукумати Буюк Британиядан олти нафар дипломатини, жумладан Манчестердаги бош консул Чжен Сиюанни чақириб олди, деб ёзмоқда Daily Mail.

Британия ташқи ишлар вазири Жеймс Клеверлининг сўзларига кўра, бундай чорага 16 октябрь куни Манчестерда гонконглик фаол билан содир бўлган воқеа сабаб бўлган. Ўша куни гонконглик бир неча ўнлаб фаоллар Хитой консулхонаси олдида Хитой Коммунистик партияси сиёсатини танқид қилувчи ва мамлакатда демократик ислоҳотлар ўтказишни талаб қилувчи плакатлар билан тўпланган.

Бироз ўтгач, намойишчиларни тарқатиш учун консулхонадан дубулға ва ҳимоя камзулини кийган бир неча эркак чиққан. Намойишчилардан бири мажбуран консуллик ҳудудига олиб кетилган ва у ерда гўёки калтакланган. Британия оммавий ахборот воситаларининг ёзишича, британиялик полициячи Хитой дипломатик ваколатхонасига кириб, можарони тўхтатган ва у ердан фаолни олиб кетган.

«Катта Манчестер полицияси тергов бошлади ва унинг бир қисми сифатида олти нафар хитойлик амалдорни сўроқ қилиши учун уларни дипломатик дахлсизликдан маҳрум қилишни сўради», — деди Клеверли.

ТИВ раҳбарининг айтишича, бу ҳақда Хитой элчихонаси хабардор қилинган. Буюк Британиянинг сўровига жавобан ХХР ҳукумати ушбу амалдорларни, шу жумладан бош консулни Буюк Британиядан чақириб олган.

Аввалроқ Буюк Британия бош вазири Риши Сунак Хитой—Буюк Британия муносабатларининг «олтин даври» тугаганини маълум қилганди.