Ukraina Oliy aksilkorrupsiya sudi qarori bilan mamlakat sobiq prezidenti Viktor Yanukovichning butun mol-mulki davlat foydasiga musodara qilindi. Bu haqda Ukraina Adliya vazirligi vakillari ma’lum qildi.
Sud press-relizida aniqlik kiritilishicha, Ukraina hukumati Yanukovichning “Mejigorye” qarorgohini (shu jumladan, “Xonka” klub uyini), Suxoluchyedagi mehmonxona-restoran majmuasini, Kiyevdagi kvartirasini, parkovka joylarini, bank hisoblaridagi 31 million grivna (840 ming dollar) va 84,9 ming dollar pulini, “Tantalit” va “Dom Lesnika” MCHJ ustav kapitalidagi 100 foiz ulushlarini, 18,7 million yevrolik 537 dona madaniy qimmatliklarini (kitoblar, kartinalar, antikvar mebel, soat, guldon, tarixiy qurollar) musodara etgan.
Sobiq prezident mol-mulkini musodara qilish haqidagi ish 2014-yildan buyon Bosh prokuratura zimmasida “natijasiz” turgan, 2019-yilda esa Ukraina Milliy aksilkorrupsiya byurosiga o‘tkazilgan.
“Yanukovich Rossiya Federatsiyasiga Ukrainaga qarshi terrorchilik faoliyati olib borish uchun hamda agressiv urushga imkoniyat yaratgani musodara uchun asos bo‘ldi. Bundan tashqari, u prezident Zelenskiyga ochiq murojaat bilan chiqib, agressor mamlakat shartlarini qabul qilish yo‘li bilan urushni to‘xtatishga da’vat etdi”, — deyiladi Oliy aksilkorrupsiya sudi xabarida.
Avgustda Ukraina sudi Viktor Yanukovichning o‘g‘li Aleksandrdan 304 million grivna (8,2 million dollar) mablag‘ni musodara qilgan edi. Pullar Mudofaa vazirligi Razvedka bosh boshqarmasi hisobiga o‘tkazilgan.
Viktor Yanukovich 2014-yilgi davlat to‘ntarishidan so‘ng mamlakatni tark etgan. 2015-yilning fevral oyida esa Ukraina bosh prokuraturasi sobiq prezidentni sirtdan jinoiy javobgarlikka tortish ishini boshlagani va sobiq prezidentni ekstradatsiya qilishni so‘rab Rossiyaga murojaat qilgani ma’lum bo‘lgan.
Bosh prokuratura Yanukovichni jinoiy uyushma tuzishda gumonlanishini ma’lum qilgan. 2017-yilning iyulida esa Kiyevning Obolon sudi unga nisbatan davlatga xoinlik bo‘yicha ishni ko‘rib chiqishni boshlagan va 2019-yilning 24-yanvarida unga nisbatan 13 yilga ozodlikdan mahrum etish to‘g‘risida sirtdan hukm chiqargan.
Yanukovich, shuningdek, Yevromaydon paytida tinch aholining o‘ldirilishi, katta miqdordagi moliyaviy mablag‘lar o‘g‘irlanishida ham ayblangan.
2021-yilda u “Mejigorye” qarorgohi haqidagi ish bo‘yicha sirtdan hibsga olindi.
Mavzuga doir:
Izoh (0)