Niderlandiyaning ba’zi shaharlari Marokash ishtirokidagi o‘yinni maydonlarda namoyish etishdan bosh tortdi

Niderlandiyaning ba’zi shaharlar rasmiylari JCH—2022 yarim finalidan o‘rin olgan Marokash—Fransiya bahsini ko‘rsatishdan bosh tortdi.

NU.nl xabariga ko‘ra, tartibsizliklar kelib chiqishi mumkinligi uchun Amsterdam, Gaaga, Rotterdam va Utrextda Afrika terma jamoasining Fransiya bilan o‘yini katta ekranlarda namoyish etilmaydi.

Ushbu shaharlarning ba’zilarida allaqachon politsiya ko‘chalarda nazoratni kuchaytirganini e’lon qilgan, qolgan shaharlarda esa bu muhokama qilinmoqda.

“Tartibsizlik keltirib chiqaruvchilar futbol muxlislaridan iborat olomondan boshpana sifatida foydalanishi mumkin. Maydonlarda esa biz yaxshi niyatli odamlarni yomon niyatli odamlardan ajrata olmaymiz”, — deya ta’kidladi Gaaga munitsipaliteti.

Marokashning yarim finaldagi o‘yini 14-dekabr kuniga mo‘ljallangan.